Chamberwahlen 2018 Stéphanie Empain méiglech gréng Spëtzekandidatin am Norden
D'Nord-Lëscht vun déi gréng fir d'Chamberwahle kéint 100,7-Informatiounen no nieft dem Claude Turmes vun der Stéphanie Empain ugefouert ginn. De grénge Parteipresident wëllt d'Informatioun net kommentéieren.
Déi 34 Joer al Stoffwëndelberoderin vun Ierpeldeng a fréier Chargée de mission bei der Arméi ass eisen Informatiounen no am Gespréich fir d'Spëtzekandidatur vun der Françoise Folmer ze iwwerhuelen. De grénge Parteipresident kommentéiert d'Informatioun net. De Christian Kmiotek sot eis awer, d'Wahlkommissioun hätt dem Bezierk Norden e Virschlag gemaach. De Bezierk géif séier eng Decisioun huelen. D'Stéphanie Empain war virun zéng Joer schonn am Comité vun déi jonk gréng.
D'Françoise Folmer hat de 5. Juni iwwerraschend annoncéiert sech mat Effet immédiat aus der Politik zeréckzezéien. Op der Lëscht vun déi gréng am Norden ass wéinst där Demissioun nach eng Plaz ze besetzen: Et muss also nach e Kandidat oder eng Kandidatin designéiert ginn.
Méi zum Thema
Françoise Folmer hält mat Politik op
D'Co-Presidentin vun déi gréng huet nom Doud vum Camille Gira iwwerraschend op engem Kongress annoncéiert, datt si mat der Politik ophält. Si kandidéiert also net fir d'Chamberwahlen am Oktober.
"Äddi Camille"
Fir un de verstuerwene Staatssekretär Camille Gira z'erënnere war um Samschdeg eng offiziell Zeremonie am Haff vum Staatsministère. Wou elo och eng nei Lann un de grénge Politiker erënnert.
De Camille Gira ass gestuerwen
Trauer ëm de Staatssekretär am Ëmweltministère: De Camille Gira (déi gréng) ass gëschter Owend onerwaart am Alter vu 59 Joer gestuerwen.
