D'Stad Lëtzebuerg ass amgaang, eng Rei Gebailechkeeten ze amenagéieren: dorënner eidel administrativ Gebaier um Bouillon, déi eng 200 Leit kéinten ënnerkréien. Donieft géif déi al Pompjeeskasär op der Areler Strooss zur Verfügung gestallt ginn.
Zu Bouneweg hätt d'Stad Lëtzebuerg en Hotel gelount, an deem 27 Persoune logéiert kéinte ginn.
Zu de Flüchtlinge géifen och Hausdéiere gehéieren - do wieren dës gréisser Strukturen net adequat. Dowéinst géif ee versichen, eidel Haiser, déi der Gemeng gehéieren, ze amenagéieren. D'Buergermeeschtesch Lydie Polfer seet, datt dat awer net evident wier, well dës Gebaier renovéierungsbedürfteg wieren:
"Mir hunn eng 750-800 Wunnengen, vun deenen all Joer een Zéngtel renovéiert ginn. Dat sinn der eng Rei. Vläicht hu mir der, mee mir musse ganz prezis kucken. Kann een der elo net awer huelen, fir op esou Situatiounen eng massgeschneidert Äntwert ze ginn."
D'Buergermeeschtesch plaidéiert och fir privat Léit ënnert d'Äerm ze gräifen, déi Flüchtlinge bei sech doheem logéieren:
"Si hunn eng grouss Generositéit bewisen, mee et ass awer och eng finanziell Belaaschtung. Dat mécht een eng Zäit, mee dat kascht awer. Dat muss um nationale Plang gekuckt ginn, datt een dat op mannst begleet."
D'Lydie Polfer kéint nëmme schwéier aschätzen, wéi vill Leit nach op Lëtzebuerg nokomme géifen. Dat géif alles vun der Entwécklung vum Krich ofhänken, seet d'Buergermeeschtesch vun der Stad Lëtzebuerg.