Däitschland SPD an den Ëmfroe virun CDU/CSU

Et muss ee wäit zeréckgoen - genauer gesot: et muss ee 15 Joer zréckgoen, an d'Joer 2006, fir e bundeswäite Sondage ze fannen, an deem d'SPD virun der Unioun vun CDU an CSU louch. Et war eng aner politesch Welt deemools: an der Bundestagswal ee Joer virdrun hunn SPD an Unioun zesumme bal 70 Prozent kritt. D'Land vun de Volleksparteie war wäit ewech vun der zerspléckter Parteielandschaft vun haut.

15 Joer an 12 kommissaresch a net-kommissaresch Parteicheff:inne méi spéit ass et nees sou wäit: d'SPD läit an de Sondagë vir. Virun der Unioun, virun de Gréngen. An dat just e knappe Mount virun der Bundestagswal. Op eemol dreemen d'Sozialdemokraten nees vum Kanzleramt.

Dobäi ass et nach guer net laang hir, datt d'SPD endgülteg ofgeschriwwe gi war. Wéi d'Partei lescht Joer den Olaf Scholz zum Kanzlerkandidat ernannt huet - bal e Joer virun der Wal a bei Sondagewäerter vu 14-15 Prozent - huet dat politescht Däitschland gelaacht.

Et gouf souguer driwwer geschwat, ob et fir d'SPD net besser wier, dëst Kéier just ee Spëtzekandidat, awer net e Kanzlerkandidat opzestellen. Sou schlecht stoung et ëm d'Partei.

Den Olaf Scholz huet näischt falsch gemaach

An de leschte Méint ass permanent vun engem Duell tëscht der Gréngen-Kandidatin Annalena Baerbock an dem Uniouns-Kandidat Armin Laschet geschwat ginn. Stand haut ass e Kanzler Olaf Scholz guer net méi sou onrealistesch. Wou kënnt dee rezenten Héichtefluch hier? Wat huet d'SPD, wat huet den Olaf Scholz gemaach?

D'Äntwert dorops ass wuel ganz einfach: am Fong net ganz vill. Wärend seng Géigekandidat:inne vun engem Fettnäpfchen an dat nächst gehopst sinn, huet de Olaf Scholz näischt gemaach. Jiddwerfalls huet en näischt falsch gemaach. Keng Skandaler, keng negativ Opmierksamkeet. D'Sozialdemokrate profitéiere vun der Schwächt vun hire Géigner.

A se profitéieren, dat war scho laang virun de gudde Sondagewäerter kloer, vun hirem Spëtzekandidat. Den Olaf Scholz huet, dat muss ee sou soen, staark perséinlech Sondagewäerter. E rezente Sondage vum Meenungsfuerschungsinstitut infratest-dimap huet erginn, datt 40 Prozent vun den Däitschen den Olaf Scholz an enger direkter Wiel zum Kanzler géife wielen. Am Verglach: Den Armin Laschet kënnt op 16, d'Annalena Baerbock op 12 Prozent.

Gutt Kaarte fir d'Sozialdemokraten

Den Olaf Scholz ass kee Politiker, dee fir grouss Begeeschterung suergt, anescht wéi säi Virgänger Martin Schulz viru véier Joer. Mee en ass als pragmatesche Politiker bekannt, als ee mat Erfarung als Bundesminister a Vizekanzler - eppes, wat seng Géigner net kënne vu sech behaapten.

Wann d'Sondagezuelen esou bléiwen, geet d'SPD mat beschte Kaarten an d'Bundestagswal de Enn September. Mat enger staarker SPD an engem gudde Resultat vun de Grénge sinn och Majoritéiten iwwer d'Unioun ewech méiglech. Wa sech d'Sozialdemokraten da géint déi Gréng behaapten, wier de Wee an d'Kanzleramt fräi.