Kanada Solidaritéit no déidlecher Schéisserei a Moschee

Trotz den äisegen Temperaturen waren an der Nuecht honnerte Leit zu Montreal zesummekomm.

Mat hire Solidaritéitsmessagen hu si e bësse Wiermt an déi kal Nuecht bruecht. Mat Käerzen am Grapp hu si der moslemescher Communautéit vum Québec hir Ënnerstëtzung ausgedréckt, nodeems e Sonndeg ee jonke Mann während dem Owesgebiet an der grousser Moschee vun der Stad Québec op déi Gleeweg geschoss hat. Sechs Leit hat hien ëmbruecht.

Den Haider ass ee Kanadier mat irakeschen Originnen. Hien ass entsat, datt esou Attacken an engem friddleche Land wéi Kanada kenne geschéien. Mee hie wéilt sech vun esou Leit net ënnerkréie loossen. "Mir wäerte weider hei liewen. Mir wäerte weider eis Steiere bezuelen."

Versammlungen wéi déi zu Montreal si Gëscht uechtert de Kanada organiséiert ginn, dorënner zu Ottawa, an der kanadescher Haaptstad, zu Toronto an natierlech zu Québec-City, wou och de kanadesche Premier Justin Trudeau an de quebecesche Premier Philippe Couillard mat dobäi waren.

Politik rifft zu Eenheet op

De Message war iwwerall deen, datt d'Islamophobie an de Rassismus keng Plaz a Kanada hunn. De Justin Trudeau sot, d'Kanadier missten elo zesumme kommen, fir géint den Haass ze kämpfen. "Mir wäerten net mat Gewalt op d'Gewalt äntweren." Et géif een ëmmer mat Léift a Matgefill äntweren, sou de Premier.

D'Attack op d'Moschee zu Québec huet och politesch Divisiounen fir een Ament verschwanne gedoen, wou dem Trudeau seng politesch Géigner säin Appell fir d'Unitéit widderholl hunn. "Mir verspriechen, datt mir wäerte gëeent wäerte bleiwen, fir géint den Haass, d'Intoleranz an d'Islamophobie ze kämpfen", sou de Chef vun der sozialdemokratescher Partei NDP, Thomas Mulcair.

De presuméierten Auteur vun der Schéisserei, ee 27 Joer ale Student aus dem Québec, ass mëttlerweil an 11 Punkten ugeklot ginn. Mee nach versteet keen esou richteg, wat dëse jonke Mann ouni Casier dozou beweegt huet, fir sou eng Attack duerchzeféieren.