De Lëtzebuerger Kardinol Jean-Claude Hollerich, dee vum Poopst François als Generalrapporter fir d'Welt-Synod ernannt ginn ass, schwätzt sech nämlech kloer fir eng méi oppe Kierch aus. Virun e puer Méint wier et och zu engem Treffen tëscht dem Kardinol an der LGBT-Associatioun komm, erkläert de Laurent Boquet vu Rosa Lëtzebuerg.
"Ech mengen dass e Kardinol bei eng LGBT-Associatioun kënnt fir mat hinnen den Dialog ze sichen ass näischt Alldeegleches. Dat ass eppes wat exzeptionell ass a wou mer eis och bewosst sinn, datt dat e grousst Zeeche vun der Kierch ass."
Zu Lëtzebuerg wier et immens flott méiglech sech an der Kierch ze engagéieren an ze praktizéieren, mengt de Laurent Boquet. Weltwäit gesi géif d'LGBT-Communautéit awer ëmmer nees Réckschléi erliewen. Dacks duerch Aussoe vu Bëscheef, Kardineel oder och vum Poopst selwer.
Rosa Lëtzebuerg fuerdert weider en Aarbechtsgrupp
Hei am Land hätt ee mam Kardinol Jean-Claude Hollerich en immens staarke Gespréichspartner, esou nach de Laurent Boquet. Et misst awer och am Fong vun der Kierch ukommen.
Eng Fuerderung déi net nei ass. Viru knapp zwee Joer hat d'LGBT-Associatioun an engem oppene Bréif d'Iddi vun engem Aarbechtsgrupp lancéiert fir e reegelméissegen Austausch mam Bistum ze erméiglechen. Dozou wier et awer bis ewell net komm, confirméiert de Laurent Boquet vu Rosa Lëtzebuerg.
