Alles wier prett, et misst ee sech just nach iwwer en Taux Eens ginn, sot den DP-Finanzminister Pierre Gramegna rezent op RTL. Mee wéini dat soll geschéien, bleift onkloer. Och, well d'Koalitiounspartner sech nach ëmmer net iwwer d'Zilsetzung Eens sinn.
D'Bedenke vun der LSAP
Den LSAP-Vize-Premier Dan Kersch hat rezent an engem Land-Interview ausgeschloss, datt d'Grondsteier esou staark géif erop gesat ginn, datt doduerch däitlech méi ongenotzte Bau-Terrainen kéinte mobiliséiert ginn. Dobäi gëtt d'Grondsteierreform am Regierungsprogramm ebe grad als Mesure géint d'Spekulatioun annoncéiert.
Dat géif fir d'LSAP esou och nach ëmmer gëllen, seet de sozialistesche Fraktiounschef Georges Engel. Mee den Dan Kersch hätt zu Recht och eng méi héich Besteierung vun de Plus-Valuën an d'Gespréich bruecht:
"Bei där Evolutioun déi mir hunn, mat deenen enorme Präisser an deenen enorme Plus-Valuën, déi do gemaach ginn, fannen ech et abwegeg net doriwwer nozedenken, fir déi Plus-Valuë méi ze besteieren."
DP: "Der Saach eng Chance ginn"
D'Bedenke vun der LSAP géifen hien am Fong net erstaunen, seet den DP-Fraktiounschef Gilles Baum. Déi dräi Parteien hätten ënnerschiddlech Iddien. D'Grondsteierfro kéint een trotzdeem léisen:
"Komm mir ginn där Saach elo Mol eng Chance. Mir mussen elo och Mol Zuelen op den Dësch leeën a kucken a wéi eng Richtung mir eis bewegen. Wat wichteg ass, ass dat wat am Koalitiounsaccord steet, datt mir um Haaptwunnsëtz näischt wëllen änneren, dat schéngt mir dat allerwichtegst."
Déi gréng wënsche sech Regierungsklausur virum Summer
Datt d'Grondsteier fir d'Eegenheem guer net klëmmt, wëll de François Benoy vun déi gréng esou kategoresch net ausschléissen - betount awer och:
"Et geet natierlech net drëms déi Leit ze bestrofen, déi an hirem eegenen Heem wunnen. Mir hunn immens vill Terrain am Perimeter, déi disponibel sinn a prioritär geet et drëms fir deen ze mobiliséieren an do Wunnraum ze schafen. Dat ass jo déi Haaptkris, déi mir hunn."
De grénge Vize-Premier François Bausch da sot eis op Nofro hin, hie géif sech eng Regierungsklausur nach virum Summer wënschen, wou dann och iwwer d'Grondsteier geschwat gëtt.