Corona-Kris Personell Engpäss sinn net auszeschléissen

Stand leschte Samschdeg de Moie wieren an den Alters- a Fleegeheemer uechter d'Land eng 35 Bewunner mam neie Coronavirus infizéiert gewiescht. 20 Leit vum Personal hätte sech bis dohin ugestach gehat, seet de Marc Fischbach, de President vun der COPAS, dem Verband vun de Prestatairen an de Beräicher Hëllef a Fleeg vun eelere Leit.

Maurice Molitor (Interview) / Claude Biver (Web)

Marc Fischbach
De Marc Fischbach ass President vun der COPAS. Foto: Archiv

D'Situatioun an den Haiser wier nach net extrem alarmant, mee et wier een natierlech op méi problematesch a kritesch Zäite virbereet. Et géif ee riskéieren, datt et an den nächste Wochen e personellen Engpass kéint ginn, seet de Marc Fischbach, et géif elo schonn op gewësse Plazen e Personalmanktum ginn. "Mee dee kann nach vill méi akut ginn, an da musse mir versichen op aner Leit zeréckzegräifen, déi nach disponibel sinn."

Engpass bei Masken ass net ausgeschloss

Eng éischt Ulafstell wiere Leit aus dem Secteur an da missten och Leit aus dem Congé zeréckgeruff ginn. "An da musse mir awer och op Leit ausserhalb vum Secteur zeréckgräifen," de Marc Fischbach schwätzt vun der Reserve sanitaire.

De Gesondheetsministère géif recommandéieren, datt eng Persoun op hirer Aarbecht aacht Stonnen dee selwechte Mask droe kéint. Dofir géif een an der Fleeg pro Dag ongeféier 10.000 Maske brauchen. Am stationären an am ambulante Secteur bräicht een dofir pro Woch 70.000 Masken. Engpäss wieren dofir op Dauer net auszeschléissen, sou de Marc Fischbach.

"Et denkt ee jo un alles"

De Marc Fischbach erlieft déi aktuell Situatioun perséinlech "ganz schwéier". Seng Schwéiermamm ass an engem Fleegeheim an ass wäit iwwer 90 Joer al, seet hien. Hie kéint dohier och aus perséinlecher Erfarung schwätzen, mee och als President vun der COPAS wier hien all Dag konfrontéiert mat Froen an Informatiounen, déi hie beschäftegen.

"An ech si jo och keen där Jéngster, an do denkt ee jo un alles. An och dorunner. An dofir mengen ech, sollt ee sech gutt schützen. Mee dat verhënnert net, datt ee sech permanent Gedanken, Suerge mécht iwwer Situatiounen, déi awer musse gereegelt a geléist ginn, wa se antrieden. "

An der Mediathéik:

Invité vum Dag / / Maurice Molitor
Lauschteren

Méi zum Thema

Dr. Paul Rauchs
Corona-Pandemie

Angscht virun eppes hunn erméiglecht eng Reaktioun, ënnersträicht de Psychiater Paul Rauchs. De Coronavirus ass awer onheemlech, well een en net gesäit, an do riskéiert eng Angoisse ze entstoen, warnt de Paul Rauchs.

Staatsministère Illustratioun Waringo-Rapport
Corona-Pandemie

15 Persoune sinn hei am Land wéinst dem Coronavirus gestuerwen, d'Zuel vun den Hospitalisatiounen ass op 148 geklommen. D'Regierung huet fir déi éischte Kéier gesot, wéi vill Better alles an allem disponibel wieren.

Corona-Hotline
Corona-Pandemie

8002-80-80: Dat ass déi dëser Deeg vill ernimmten - a gewielten - Nummer vun der Coronavirus-Hotline. Wien ass um aneren Enn vun der Leitung a wat fir Erfarungen hu si an deene leschte Woche gemaach?

Programm

Net verpassen

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen