Cyclissem Optakt vum Tour de Lëtzebuerg

Bis e Samschdeg rullt de Peloton - 21 Ekippe mat jee 6 Coureuren - 740 Kilometer queesch duerch d'Land. D'Kinneksetapp ass um Mëttwoch, wou d'Montée op Eschduerf, mat bis zu 11 Prozent Steigung, direkt dräi Mol gefuer gëtt. De Vainqueur vun dëser 81.Editioun gëtt nees no der Arrivée bei der Victor Hugo-Hal um Lampertsbierg gefeiert.

Leschten Optrëtt fir de Ben Gastauer

Den Titelverdeedeger Diego Ulissi wäert dëst Joer net un de Start goen, dofir awer eng Rei Coureuren, déi sech bei aneren Etappecoursse schonn en Numm gemaach hunn: dorënner de Portugis Joao Almeida, de Kolumbianer Nairo Quintana an d'Fransousen David Gaudu an Thibaut Pinot.

Fir de Bob Jungels ass et déi éischt Course no iwwer 3 verletzungsbedéngt Méint Paus. Fir de Ben Gastauer wäert et déi lescht Course a senger professioneller Karriär sinn.

Zejoert goufen et jo e puer Incidente beim Tour: d'Coureuren haten aus Suerg ëm hir Sécherheet souguer ee Moment gestreikt. Dofir gouf d'Securitéits-Konzept zanter dem leschte Joer iwwerschafft, an dobäi stoung d'Sécherheet vun de Coureuren am Mëttelpunkt, sou den Tour-Direkter Andy Schleck. Et wier een elo op engem Sécherheetsniveau, deen ee bis elo "nach bei kenger Lëtzebuerger Course esou" hat.

D'Police biet d'Leit, sech am Virfeld iwwer méiglech Fermeturen a Perturbatiounen op der Strooss ze informéieren an d'Signalisatiounen op der Strooss ze respektéieren. Och eng Parti Busser ginn ëmgeleed respektiv wärend der Manifestatioun suppriméiert.