Impfplang Och am Fleegesecteur gouf ee Verwaltungsrotsmember fréizäiteg geimpft

De President vun de Stater Hospices Civils, Henri Grethen, krut am Februar eng Covid-Impfung. Dëst nodeems och ëffentlech bekannt war, datt Verwaltungsréit net an der éischter Phas vun der Impfcampagne dru wieren.

Pia Oppel / jcf

Exklusiv Henri Grethen
De fréieren DP-Minister Henri Grethen ass President vun de Stater 'Hospices Civils' a vun der 'Fondatioun Kräizbierg' (Archivfoto).

Den Henri Grethen gouf am Februar als President vun de Stater Hospices Civils geimpft - dëst entgéint de Consignë vun den Autoritéiten an nodeems och ëffentlech kloer gestallt gi war, datt Verwaltungsréit net an der éischter Phas vun der Impfcampagne dru wieren.

De fréieren DP-Minister, deen och President vun der Fondatioun Kräizbierg ass, erkläert d'Decisioun mat senger regelméisseger Präsenz an de béide Strukture fir eeler Leit respektiv Leit mat enger Behënnerung.

"Deel vum Personal"

D'Direktioun vun den Hospices Civils seet, fir si géif den Henri Grethen zum Personal gehéieren. Hie misst vill Aufgaben erfëllen, fir déi hien an d'Altersheem misst kommen - zum Beispill fir Dokumenter z'ënnerschreiwen. Déi aner Verwaltungsrotsmembere goufen net geimpft.

Verwaltungsrotsmembere gehéiere juristesch gesinn net zum Personal, well se weder ee Salaire nach ee Kontrakt hunn. Am Fleegesecteur war déi éischt Phas vun der Impfcampagne op déi direkt Salariéë limitéiert: Souguer Sous-Traitanten, zu deenen dacks d'Botzpersonal, de Kichenzerviss oder d'Sécherheetsleit gehéieren, sinn explizit ausgeschloss.

Wéi eng Kontroll vun den Impflëschten?

Den Henri Grethen gouf den 19. Februar an den Hospices Civils geimpft, dëst vun der mobiller Equipe, déi d'Santé an d'Alters- a Fleegeheemer schéckt. D'Lëschte vun de Leit, déi geimpft solle ginn, ginn am Virfeld vun den Haiser selwer opgestallt an da vun der Santé iwwerpréift. D'Funktioun vum Personal, dat soll geimpft ginn, muss hei präziséiert ginn.

De Gesondheetsministère huet eis Froen zu dëser Prozedur an dem Fall vum Henri Grethen bis ewell nach net beäntwert.

COPAS: Recommandatioune ware kloer

D'COPAS, den Daachverband vun de Prestatairen am Fleegesecteur, hat den 1. Februar an engem Schreiwes un d'Membere präziséiert, datt just "personnel salarié" dierft geimpft ginn.

De COPAS-President Marc Fischbach nennt de Fall vum Henri Grethen "bedauerlech". Dëst wier a sengen Aen am Secteur wuel awer een Eenzelfall, "well d'Haiser jo ganz kloer woussten, dass d'Leit aus dem Conseil d'Administration net däerfte prioritär mat geimpft ginn."

De Marc Fischbach gesäit an dësem Kontext awer och d'Santé an der Responsabilitéit, fir d'Impflëschten aus den Alters- a Fleegeheemer z'iwwerpréiwen.

Ëffentlech Kloerstellung de 16. Februar

De radio 100,7 hat de 16. Februar gemellt, datt dräi Membere d'Hôpitaux Robert Schuman geimpft goufen. Den Direkter vun der Santé, Jean-Claude Schmit, hat deemools ëffentlech kloer gestallt, datt dat an der éischter Phas vun der Impfcampagne net esou virgesi wier.

Méi zum Thema

Georges Mischo
Impfcampagne

Vun de véier grousse Spidolsgruppen hunn der zwee eegenen Aussoen no keng Irregularitéiten op hiren Impflëschte fonnt. De Stater CHL an den Escher CHEM soten eis, bei hinne wiere keng Problemer entdeckt ginn.

Impfen Sprëtz
Irregularitéiten

De Centre Hospitalier du Nord huet eng Plainte géint Onbekannt beim Parquet wéinst Irregularitéite bei der Impfcampagne deposéiert. Dëst deelt de Verwaltungsrot vum Spidol an engem Communiqué mat.

Impfen
GROUP HRS

Vill Deputéiert gesinn d'Affär ronderëm déi fréizäiteg Impfunge vun der Verwaltungsrotspëtzt vun den Hôpitaux Robert Schuman kritesch. Si selwer hätte sech net impfe gelooss wann et net un hirem Tour gewiescht wier.

Programm

Net verpassen

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen