Schwéier Stierm am Süde vu Lëtzebuerg No Tornado-Passage: Annonce vu weidere Mesuren no Regierungsrot
De Samschdeg den Owend um 8 Auer ass en extraordinaire Regierungsrot. Et wier elo wichteg, fir einfach Prozeduren an d'Weeër ze leeden, seet de Premierminister Xavier Bettel, et misste séier Léisunge fonnt ginn. De Wirtschafts- de Mëttelstands- an de Familljeministère wäerten zesummen iwwer den Deblockage vun Direkthëllefen decidéieren. Et géif verschidde Prozedure ginn, déi de Samschdeg Owend sollen op de Wee bruecht ginn, sou de Premierminister. Direkt nom Regierungsrot géif d'Press iwwer déi weider Mesuren informéiert ginn.
De CGDIS hätt sech de Freideg den Owend relativ séier en Iwwerbléck kënne verschafen, seet de Generaldirekter vum CGDIS. Et hätt ee séier kënnen Entwarnung ginn, datt keng Persoune géife vermësst ginn. D'Opraum- a Securisatiounsaarbechte wieren déi ganz Nuecht duerch viru gaangen, sou de Paul Schroeder. D'Zuel vun den Haiser, an déi d'Leit net méi kéinten zeréckgoen, wier fir de Moment op ronn sechs reduzéiert ginn.
Nom Passage vum Tornado de Freideg waren de Premierminister Xavier Bettel, grad wéi d'Inneministesch Taina Bofferding, den Aarbechtsminister Dan Kersch an de Grand-Duc Henri de Samschdeg Mëtteg zu Käerjeng an zu Péiteng, fir sech e Bild vun der Situatioun um Terrain ze maachen.
Op Facebook goufen direkt e puer Spenden-Aktioune gestart, déi bannent e puer Stonne méi wéi 40.000 Euro gesammelt hunn. Zesumme mat de Gemenge soll elo gekuckt ginn, wéi d'Sue kënnen agesat ginn.
An der Mediathéik:
LauschterenMéi zum Thema
"D'Assurancen hëllefe bei Demarchen a fir Suen ëremzekréien"
D'Assurancen hunn hire Cliente verséchert, si nom Tornado ze ënnerstëtzen. Zanter dem Freideg den Owend wieren déi meescht Agencë fir hir Clienten op, seet de Marc Hengen, Direkter vum Daachverband vun den Assurancen.
Arméi mobiliséiert, Regierungsrot kënnt beieneen
De Plan intemperies gouf declenchéiert fir finanziell Hëllef séierst méiglech kënne fräizesetzen. Weider Prioritéite sinn d'Securisatioun vun den Haiser an den Héichspannungsleitungen, sou den Direkter vum CGDIS.
Péiteng a Käerjeng raumen op
Beim Passage vun engem Tornado, deen de Freideg schwéiere Materialschued am Raum Péiteng gemaach huet, goufe 14 Leit blesséiert. Um hallwer 3 an der Nuecht waren der nach zwee vun hinnen hospitaliséiert, deelt d'Regierung mat.
Tornadoen a schwéier Onwiederen am Süde vu Lëtzebuerg
Bei de schwéieren Onwiederen am Süde vum Land sinn am Ganze siwe Persoune blesséiert ginn, eng dovu méi schlëmm. Dat schreift de CGDIS an engem Communiqué um néng Auer de Freideg den Owend.
