Ëmwelt No Pollutioun vun der Atert: "Massiivt Fëschstierwen"
No der Pollutioun vun der Atert duerch e Brand de leschten Dënschdeg an enger Biogasanlag zu Grendel an der Belsch, huet d'Sportfëscher-Federatioun e "massiivt Fëschstierwen" op enger Streck vun e puer Kilometer hei am Land fest gestallt.
Wéi eng Quantitéit genee an d'Atert gelaf ass, wier schwéier ofzeschätzen, esou de Luc Zwank vum Waasserwirtschaftsamt vum Ëmweltministère.
D'Waasserwirtschaftsamt schwätzt vun engem "relativ staarke Fëschstierwen", duerch d'Accident e puer honnert Meter hannert der Grenz.
Duerch e Sickerbrand een Dënschdeg wier eng "considerabel Quantitéit" Biomassenofwaasser bei Uewerkolpech an d'Atert gelaf, hat déi Lëtzebuerger Police gemellt.
D'Agente vun der Verwaltung hätte festgestallt, datt Piff aus engem Silo, bei deem Réier an d'Ofdichtfolie beschiedegt goufen, vun der Biogas-Anlag iwwer e Weier an och an e Fiichtgebitt gelaf ass, an esou an d'Atert komm wier.
Doduerch gouf e gréisseren Ëmweltschued festgestallt.
Fir wéi laang an der Atert net ka gefëscht ginn, wier nach onkloer. D'Piechter misste fir hire Schued entschiedegt ginn, esou de Luc Zwank vun der Waasserverwaltung.
D'Responsabiliéit fir den Ëmweltschued léich ganz kloer beim Exploitant vun der Biogasanlag an der Belsch. De Weier bei der Anlag géif ausgepompelt ginn an d'Waasser dovun entsuergt ginn.
Fir datt d'Atert hire biologeschen Equiliber séier kann zeréck fannen, soll d'Abrénge vu Piff am direkten Anzuchsgebitt vun der Baach verbuede ginn, huet déi Lëtzebuerger Sportfëscherfédératioun verlaangt.
Den DP-Deputéierten a fréiere President vum Sportfëscherverband Gusty Graas huet op Facebook ugekënnegt, datt hien der Ëmweltministerin Carole Dieschbourg muer de Mëtteg an der Chamber Froen zur Pollutioun vun der Atert wäert stellen.
Méi zum Thema
Wéi geet et eise Lëtzebuerger Flëss a Baachen?
Wéi geet et eise Lëtzebuerger Flëss a Baachen? Mir hu mat verschidde Responsabelen aus der Waasserverwaltung geschwat, fir en Iwwerbléck iwwer den Zoustand vun eise Gewässer ze kréien.
Sinn och d'Juegd- a Fëschereihidder Déiereschützer?
De Lëtzebuerger Wëldschutzverband ass zanter Kuerzem als Déiereschutzorganisatioun unerkannt. Dat wier ee Widdersproch zum Déiereschutzgesetz, mengt de gréngen Deputéierte Gérard Anzia.
