Siwe Länner hunn zanter en Donneschdeg gewielt - haut war et un 21 weideren - ënner anerem och um Grand-Duché. Ronn 230.000 Lëtzebuerger an eng 23.000 EU-Auslänner waren dozou opgeruff, fir hir Stëmm ofzeginn. Bal all fënnefte Wieler hat d'Bréifwahl ugefrot. Hei am Land si 60 Kandidaten a Kandidatinne vun zéng Parteien ugetrueden.
Den Ament ginn d'Stëmmziedelen hei am Land ausgewäert. Op Nofro bei der Presidentin vum Haaptwahlbüro um Lampertsbierg, Joséanne Schroeder, gouf et bis ewell keng Problemer bei den Auszielungen. Déi véier Stater Büroen hätten hir Bulletine schonn an de Büro centralisateur eraginn. Momentan ginn dës ausgezielt. D'Joséanne Schroeder geet dovun aus, datt dës "zimlech zügeg" ausgezielt wäerte ginn.
Et war am Virfeld vun de Wahle gefaart ginn, datt wéinst der Päischtvakanz eventuell net sou vill Leit sech géifen an d'Wahlbüro deplacéieren. Et schéngt, wéi wann dës Erwaardung sech géif bestätegen. Festleeë wëllt d'Joséanne Schroeder sech net, mee no engem éischte Bléck op d'Listes d'absences kéint ee soen, datt vill Leit sech net an de Wahlbüro deplacéiert hätten. "Genee Angabe kann ech net maachen, mee et sinn der vill. Ech géif soen, e bësse méi wéi soss, jo", sou d'Joséanne Schroeder.
All d'Resultater, Analysen a Reaktiounen zum Vote vu Lëtzebuerg a vun den anere 27 Memberlänner héiert Dir an enger Spezialemissioun vun 21 Auer un. Mir berichte live aus eisem Studio um Kierchbierg, aus dem Europahaus an der Stad an aus dem Europaparlament zu Bréissel.
