Dësen zweete Vott kann awer och duerch ee Referendum ersat ginn, wann entweder 15 Deputéiert dat froen - wat an der aktueller Konstellatioun éischter onwarscheinlech ass - oder 25.000 ageschriwwe Wieler eng deementspriechend Petitioun ënnerschreiwen.
De Mars Di Bartolomeo betount, datt dat dann och respektéiert géif ginn:
"Wann de Bierger (mat engem grousse B), wann d'Leit dobaussen, wa se sech informéiert hunn, der Meenung sinn, datt et gutt wier, wann deen zweete Vott duerch e Referendum, also duerch hire Vott, ersat gëtt, dann ass dat dat Normaalst vun der Welt."
Den LSAP-Deputéierten ass "déif dovun iwwerzeegt", datt déi aktuell Propos fir d'Revisioun vun der Verfassung - un där 15 Joer laang geschafft ginn ass - a "ganz ville Punkte wesentlech besser ass, wéi déi Texter vun 1868". Lëtzebuerg géif eng Verfassung verdéngen, "déi de Realitéite Rechnung dréit".