Militärziler, dat sot Moskau jo och schonn um Ufank vun der Invasioun. D'Realitéit um Terrain hei an der Ukrain ass eng aner schonn zënter iwwer 50 Deeg. Ziviliste waren och Ziler, dat weess ee spéitstens zënter dem Réckzuch vun de russeschen Truppen aus de Viruerter vu Kiew, a vun de Biller vu Mariupol am Südosten.
E Militärzil war et awer, dat gëschter an der Haaptstad getraff gouf - eng Fabrick fir gepanzert Gefierer, sot Moskau. De Buergermeeschter vu Kiew, de Vitali Klitschko, huet een Doudegen a och eng Rei Blesséierter annoncéiert. Hien huet d'Méiglechkeet genotzt fir de Leit, déi Kiew verlooss haten, ze soen, datt si nach net sollen zeréckkommen. Méi Rakéitenugrëffer wiere warscheinlech.
D'Sireene sinn och nees hei am Weste vum Land lassgaangen. An der Géigend vu Lwiw goufe véier russesch Rakéite vum Ofwiersystem ofgeschoss, seet Kiew. D'Arméi mellt, datt déi Rakéite vu Fligere geschoss goufen, déi a Belarus stationéiert sinn.
Et gouf ënnerhalb vu 24 Stonne Rakéitenugrëff an aacht Regioune vum Land, datt ass e groussen Deel vum Territoire. E Rappell, datt Russland d'Méiglechkeet huet, fir egal wou an egal wéini unzegräifen.
Moskau wëll sech awer weiderhin op den Oste konzentréieren. Am Donbas soll eng grouss Offensiv kommen, op Plaze wéi Kharkiv, der zweetgréisster Stad an der Ukrain. Do sinn no Artillerie-Ugrëffer eng Rei Ziviliste gestuerwen. An zu Mariupol am Südosten sinn ukrainesch Zaldoten nëmmen nach an engem grousse Stolwierk ze fannen, seet Moskau. Déi éischt Groussstad kéint geschwënn ganz a russescher Hand sinn. Moskau géif eng zerstéiert Stad kontrolléieren, mee eng taktesch wichteg.