/ Luc Frieden: Et braucht ee gesamt-europäescht politescht Steierungsinstrument
Eurozon
Luc Frieden: Et braucht ee gesamt-europäescht politescht Steierungsinstrument
Hien hätt zu kengem Moment en Echec vum Euro gefaart - weder bei senger Aféierung, nach méi spéit wärend der Griichelandkris, sou de Luc Frieden. Hie war 2002 Budgets- an Eurominister, wéi déi gemeinsam Wärung ageféiert gouf, an no 2009 Finanzminister, wéi se hir wuel schwéierst Kris erlieft huet. Datt déi haut 19 Euro-Länner zwar eng gemeinsam Wärung, mee keng wierklech gemeinsam Budgets- a scho guer keng gemeinsam Wirtschaftspolitik hunn, wier e Konstruktiounsfeeler vum Euro, deen ee mat der Zäit behiewe misst.
De Luc Frieden ass President vun der Lëtzebuerger Chambre de Commerce.
Trotz de Lacunë vum Euro, déi op noutwenneg politesch Kompromësser zeréckzeféiere wieren, hätt hien ni en Zerbrieche vun der Wärung gegleeft, sou de Luc Frieden. Et géif momentan awer kee gesamt-europäescht politescht Steierungsinstrument fir d'Euro-Zon ginn. "Déi politesch Unioun, déi feelt", sou de Luc Frieden. Dofir misst ee weider Stécker dobäisetzen, fir dat den Euro laangfristeg d'Krittäre vun enger groussen internationaler Wärung erfëllt.
Den Euro ass fir hie méi wéi eng Wärung, sou de fréiere Lëtzebuerger Finanzminister.
"Den Euro ass, wéi Schengen, e Verbindungsglied tëscht de Länner, déi dat decidéiert hunn (déi 19 haut, déi 12 deemools). An dofir hunn ech et (een Zerbrieche vun der Eurozon n.v.d.R.) ëmmer ausgeschloss."
