Ukrain-Konflikt Lëtzebuerger zu Kiew: Oniwwersiichtlech Situatioun
Op der Plaz gëtt d'Situatioun als oniwwersiichtlech erlieft, seet eis ee Lëtzebuerger, deen zu Kiew wunnt. D'Onsécherheet wier grouss, sou den Daniel Porcedda. Hien hält sech den Ament mat senger Famill a senger Wunneng op.
Gëschter ware si dee Raum kucke wou si sech, dem Kiewer Buergermeeschter no, solle verschanzen, wann et an hirem Bezierk zu engem Fligeralarm kënnt. Dat wier eng "Ernüchterung" gewiescht, sou den Daniel Porcedda.
Dat Gebai wier eng kleng Schoul vun engem oder zwee Stäck gewiescht an déi am Eeschtfall just Fraen a Kanner era gelooss géife ginn. "Wat fatal ass, well an deem Bezierk wou mir hei wunnen, liewe puer dausend Leit", sou den Daniel Porcedda.
Do wou hie mat senger Famill wunnt géif een zwar ëmmer erëm Explosiounen héieren, mee et géif een näischt dovu gesinn.
Hien hat mat senger Famill decidéiert op der Plaz ze bleiwen: fortzegoen wier aktuell méi geféierlech, sou seng Aschätzung.
Méi zum Thema
Kämpf am Groussraum Kiew
Déi éischt russesch Zaldote sinn an der ukrainescher Haaptstad Kiew, sou den ukrainesche Verteidegungsministère. Déi russesch Unitéite wieren am Norde vu Kiew, schreift de Ministère weider.
