De Stroum vu Flüchtlingen dierft an de nächste Woche weider klammen, a Lëtzebuerg preparéiert ech op déi Situatioun, esou de Jean Asselborn. Gebraucht gëtt elo eng Hal an der Ëmgéigend vun der Stat Lëtzebuerg fir 500 bis 1000 Leit ënner ze bréngen. Donieft goufen eng 70 Leit, déi an der Asylprozedur sinn, vun der Structure d'hébergement d'urgence op de Findel verluecht, doduerch ginn 200 zousätzlech Better fräi.
Dat sinn awer just kuerzfristeg Léisungen, wéi den Ausseminister erkläert:
"Mir sinn amgaang och fir méi durabel Strukturen ze fannen. Hei ass elo vum Primo-Accueil, an do si mer amgaang mat de Gemengen, mat dem Service national de la jeunesse, eng Dose Strukture wäerte mir do kuerzfristeg operationell hunn."
Ënner dëse Gebaier sinn ënner anerem Hotellen, awer och Kulturzentren.
Appell dofir, Privat-Initiativen ze mellen
Keen Iwwerbléck huet ee momentan bei de sëllege privaten Initiativen. Hei war et den Appell vum Immigratiounsminister, onbedéngt d'Immigratiounsservice ze kontaktéiere fir d'Aktiounen ze koordinéieren.
Wat déi betraffe Leit aus der Ukrain ugeet, esou sollen déi sech bei der Immigratioun mellen - d'Personal géif dofir do opgestockt ginn.
All Persoun, déi zum Zäitpunkt vum Krichsufank an der Ukrain gelieft huet, kritt zu Lëtzebuerg de Statut de protection temporaire - dat onofhängeg vun der Nationalitéit, seet de Jean Asselborn:
"Si hunn dann d'Recht op Hebergement, op Hygiène, op Iessen, op Kleeder, op medezinesch Versuergung. Kanner, déi an d'Schoul ginn, op Schoulmaterial. An si hunn d'Recht och op Aarbecht: Dat ass wichteg, an den Aarbechtsminister preparéiert do nach haut e Virschlag, datt déi Leit och kënnen an d'Adem ageschriwwe ginn."
Den Ausseministère huet speziell Hotlinen agesat fir op all Fro eng Äntwert ze fannen. Déi respektiv Informatioune fënnt een um Site vum Ausseministère.