Ukrain-Krich Lëtzebuerg ënnerstëtzt d'Ukrain weider militäresch
Lëtzebuerg ënnerstëtzt d'Ukrain weider mat Waffeliwwerungen. Dat sot de Minister François Bausch um Bord vun enger Reunioun, op där iwwer eng weider EU-Militärhëllef fir d'Ukrain diskutéiert gouf.
Bis elo huet Lëtzebuerg Panzer-Ofwierwaffen, Jeepen an Zelter geliwwert.
Et géif sech am ganzen ëm Material am Wäert vu fënnef bis sechs Milliounen Euro handelen, seet de François Bausch. Et wier ze hoffen, datt eng Dier opgeet fir ze negociéieren an d'Waffe rouen, fir der humanitärer Katastroph, déi sech den Ament an der Ukrain ofspillt, een Enn ze setzen.
Mee, esou de François Bausch, wier et den Ament awer wichteg, "d'Ukrain mat Waffen ze ënnerstëtzen, dat schéngt mir ganz kloer ze sinn".
An enkem Kontakt mat der Ukrain
Detailer iwwer déi nächst Liwwerung wollt den Arméisminister aus Sécherheetsgrënn keng ginn. Et stéing een an enkem Kontakt mat der Ukrain, déi kloer Demanden doriwwer hätt, wat op der Plaz gebraucht géif ginn:
"Mir hunn enke Kontakt. Si soen eis, wat si brauchen. Et geet an déi selwecht Richtung - et ass dat, wat Dir elo opgezielt hutt, wat mir och scho geliwwert hunn - net gréisser Saachen, do hätte mir d'Moyenen net."
D'EU hat Enn Februar een éischte Pak an Héicht vu 500 Milliounen Euro decidéiert, an déi lescht Woch een zweete Pak vum nämmlechte Volume an Aussiicht gestallt.
Militäresch Hëllef gëtt mam nationale Budget finanzéiert
Lëtzebuerg bezilt déi militäresch Hëllef awer mat Suen aus dem nationale Budget, et géif ee keng Suen vun der EU an Usproch huelen, preziséiert de Lëtzebuerger Minister am 100,7-Interview.
D'Regierung wier iwwerdeems dofir, d'Sanktioune géint Russland weider ze verschäerfen. Wéi genee - doriwwer diskutéieren d'EU-Ministeren den Ament nach, mat enger Decisioun ass awer net ze rechnen. Déi wäert éischter um Niveau vun de Staats- a Regierungscheffe falen, um EU-Sommet en Donneschdeg an e Freideg.
Méi zum Thema
François Heisbourg: "La rationalité de Poutine n'est pas la nôtre"
Dem Wladimir Putin seng Ambitioune limitéiere sech net op d'Ukrain, seet de François Heisbourg am 100,7-Interview. De russesche President kéint sech no der Ukrain fir de Balkan interesséieren.
Trauer an Angscht zu Lwiw
De Krich an der Ukrain ass zënter e puer Deeg am Weste vum Land ukomm. Eng vun deene Stied ass Lwiw, eng Plaz déi weiderhin als sécher gëllt, mee wou de Fridde relativ séier vu russeschen Ugrëff op en Enn bruecht kéint ginn.
