456 Hektar fir nei Aktivitéitszonen, 481 Hektar fir grouss Wunnengsbauprojeten, reservéiert Fläche fir d'Zone Verte a fir Mobilitéitsprojeten. Dat sinn déi véier sektoriell Pläng, déi d'Regierung kierzlech un de Staatsrot geschéckt huet. Gëtt et do gréng Luucht fir d'Reglementer, da kënnen d'Pläng a Kraaft trieden.
Déi Pläng sinn eng Schwéiergebuert. Si sinn zënter iwwer 15 Joer an der Diskussioun, an no ëmmer neie juristesche Problemer a ville Kontestatioune vu Bierger a Betriber hu se missen e puer mol zeréckgezunn oder iwwerschafft ginn.
Vill verschidden Interessien
Mee zënter 2018 gëtt et en neit Landesplanungsgesetz, an d'Regierung huet d'Pläng duerch eng Consultatiounsphas lafe gelooss. Bal all d'Gemengen a bis zu 600 Bierger hätte sech zu Wuert gemellt, sou de Claude Turmes. "Mir erwaarden eis datt eng Rei Leit, och mat wirtschaftlechem Interessi, géint d'Pläng kloen, dat ass de bonne guerre", seet de Landesplanungsminister. D'Regierung géif fir den allgemengen Interêt astoen. Verschidde Remarquen, déi e privaten a keen allgemengen Interêt haten, wieren dofir net iwwerholl ginn.
Am Plang fir de Wunnengsbau sinn an der neier Versioun 30 Hektar manner fir grouss Projete reservéiert, mä ëmmerhi sollen déi 481 Hektar duergoe fir 20.000 Wunnengen. Haaptsächlech um Kierchbierg, zu Zéisseng an der Porte de Hollerich, sou wéi op de fréiere Frichen zu Wolz, Diddeleng an Esch-Schëffleng.
Bezuelbare Wunnraum
30 Prozent vun de Flächen an de grousse Wunnprojete sollen ënner de Critèrë vum "bezuelbaren" Wunnraum falen. "Vill Leit aus der Immobiliewirtschaft hätte léiwer manner däers erschwéngleche Wunnraum gehat, mä fir eis ass dat wichteg well d'Präisser eis sou séier fortlafen", erkläert de Claude Turmes. De sektorielle Plang fir de Logement wier e "grousse Schrëtt no vir".
Och fir d'Aktivitéitszonë sinn no der Consultatiounsphase eng 20 Hektar fale gelooss ginn. Déi nei Zonë solle ganz anescht geplangt ginn, esou de Claude Turmes. Hien hätt en Accord mam Wirtschaftsminister Etienne Schneider (LSAP) fonnt fir déi nei Zonë besser an d'Natur z'integréieren, esou datt net méi all Hal hiren eegene Parking hätt, mä datt et gemeinsam Parkhaiser géife ginn, Kantinnen, a soss Installatioune fir d'Personal wéi zum Beispill de Camionschaufferen. Déi nei Aktivitéitszonë solle besser vun de Leit ronderëm akzeptéiert ginn an déi, déi do schaffen, sollen e bessert Ëmfeld kréien.
Keen Accord fir méi staatlech Interventioun
Op verschiddenen Terraine soll d'ëffentlech Hand e Virkafsrecht kréien. De Claude Turmes hätt eegenen Aussoen no léiwer gehat, de Staat hätt nach méi Moyene fir ze intervenéieren. "Mir hu manner Méiglechkeete wéi zum Beispill a Frankräich. Perséinlech fannen ech dat Schued", seet de Minister. Mee dofir bräicht een eng politesch Majoritéit an déi néideg Viraussetzungen an der Verfassung.
Eppes ass kloer. D'sektoriell Pläng si wéinst dem villen Hin an Hir an de leschte Joren ofgespeckt ginn. Mee de Claude Turmes annoncéiert fir d'nächst Joer weider Léisungen. D'Regierung wéilt dann de Programme directeur virleeën, deen d'Planung vum Land bis 2035 detailléiere soll. Dat wier d'Geleeënheet fir ze kucken, wéi d'Liewensqualitéit kann erhale ginn. Bis dohi géifen och véier verschidde Comitéen de Suivi maachen. Landesplanung ass eng Erausfuerderung, sou de Minister.