Impfungen Kräizimpfungen: EMA mécht nach keng definitiv Recommandatioun
Fir d'EMA si Kräizimpfunge géint de Coronavirus interessant. Den europäesche Regulateur sot den Donneschdeg Mëtteg, et géifen Etudë ginn, déi weisen datt eng Dosis mat AstraZeneca an eng Dosis mat engem mRna-Vaccin e gudde Schutz bidden.
D'EMA huet awer nach keng definitiv Recommandatioun un d'europäesch Memberstaate gemaach. D'Decisioun géif awer egal wéi bei de Memberstaate leien, esou d'EMA.
Lëtzebuerg hat rezent gesot, et wéilt een d'Positioun vun der EMA ofwaarden. De Conseil Supérieur des Maladies Infectieuses huet sech schonn den 11. Juni fir Kräizimpfungen ausgeschwat. Eisen Informatiounen no soll de Regierungsrot muer nach eng Kéier doriwwer beroden. D'EMA huet de Mëtteg och gemengt, déi véier Vaccinen, déi an der EU zougelooss sinn, géife géint d'Delta-Variant schützen. D'Delta-Variant ass méi ustiechend wéi aner Varianten a verdrängt dofir am Moment déi fréier Varianten.
Méi zum Thema
Impfungen: Déi meescht Niewewierkungen "net schlëmm"
D'Niewewierkungen no enger Corona-Impfung zu Lëtzebuerg waren an den allermeeschte Fäll bis elo net schlëmm. Dat geet aus engem Rapport vun der Santé ervir. Et konnt keen direkte Lien mat engem Stierffall etabléiert ginn.
CSMI recommandéiert Impfung fir Jonker tëscht 12 a 15 Joer
Wien an de leschte sechs Méint de Coronavirus hat, brauch eventuell just eng Impf-Dosis ze kréien, esou den CSMI an engem Avis. Den Experte-Rot recommandéiert ausserdeem Jonker tëscht 12 a 15 Joer ze impfen.
Fräiwëlleg Impfung fir Jonker vun 18 Joer un
Jonk Leit vun 18 Joer u kënne sech vu muer un op impfen.lu aschreiwe fir eng Impfung mat de Vaccinen AstraZeneca oder Johnson&Johnson. Dobäi gelt de Prinzip first come, first serve.
J&J-Impfstoff ouni Altersbeschränkung zu Lëtzebuerg
Den Johnson&Johnson-Vaccin wäert zu Lëtzebuerg ouni Altersbeschränkunge benotzt ginn, esou de Premier Xavier Bettel haut nom Regierungsrot. D'sanitär Situatioun wier weiderhi stabel: et kéint een deemnächst mat neie Lackerunge rechnen.
