Esouwuel um Kanner-Jugendtelefon wéi och beim Elterentelefon wieren d'Gespréicher an der leschter Zäit méi laang ginn a se géifen dacks ëm d'Theema Hëlleflosegkeet an der Famill dréien. Och Eltere wieren an dësen Zäiten dacks iwwerfuerdert an déi traditionell Adresse stoungen net méi ëmmer zur Verfügung, esou d'Barbara Gorges-Wagner.
D'Zuel vu Jonken, déi sech mat Selbstmord-Gedanke beim Kanner-Jugendtelefon gemellt hätten, wier 2020 mat 46 duebel esou héich gewiescht wéi d'Joer virdrun, esou d'Barbara Gorges-Wagner. Am Ganze goufen zejoert knapp 1.600 Kontakter gezielt, déi iwwer Telefon an (ëmmer méi) online erakoumen. Dat wier fir si engersäits op den aktuellen Trend zeréckzeféieren, anerersäits wier et fir d'Kanner awer och dacks méi schwéier fir e rouege Raum ze fannen, an deem een einfach mol a Rou telefonéiere kéint.
