Zu Kiew liewen 2,8 Millioune Mënschen. Den ukrainesche Verdeedegungsministère huet een Appell un d'Populatioun an der Haaptstad gemaach, hir Wunnengen net ze verloossen. D'Leit solle sougenannte Molotow-Cocktailer fir de Kampf virbereeden.
Virdrun hat den ukraineschen Ausseminister Kuleba op Twitter vun "schreckleche russesche Rakéitenattacken op Kiew" geschriwwen.
Déi genee militäresch Situatioun an der Ukrain bleift oniwwersiichtlech. Rieds geet vu russesche Loftattacken am ganze Land.
No der grouss ugeluechter russescher Attack huet den ukrainesche President Moskau virgehäit, d'Zivilpopulatioun an der Ukrain gezielt ze viséieren. Gläichzäiteg huet de Selenskyj kritiséiert, datt et ze wéineg Ënnerstëtzung aus dem Ausland géif ginn. De President ass der Meenung, datt déi russesch Attack d'Zil hätt, hien ze stierzen.
Russland huet seng Ziler um éischten Dag vum Krich net erreescht
Russland wier bei senger Attack net esou séier viru komm, wéi geplangt. Dat ass iwwerdeems d'Aschätzung vun der brittescher Regierung. Déi russesch Arméi wier um éischte Krichsdag doru gescheitert, hir Ziler z'erreechen, heescht et vu London. Russland hätt och 450 Zaldote verluer.
Moskau selwer mellt, datt 118 ukrainesch Militär-Objeten zerstéiert wieren: dorënner 11 Militärfluchhäfen. Och dat wier net onofhängeg z'iwwerpréiwen, esou d'DPA.
100.000 Mënschen op der Flucht
D'UNO schätzt, datt an der Tëschenzäit 100.000 Mënschen op der Flucht sinn.
D'USA hunn zousätzlech 7.000 Zaldoten an Europa verluecht. Si solle virop an Däitschland stationéiert ginn, an d'Verdeedegung vun den NATO-Partnere stäerken.
Trotz der Attack op d'Ukrain géif Russland virun de Gas-Transit duerch d'Nopeschland a Richtung Europa garantéieren, esou haut de russesche Staatskonzern Gazprom.
EU schafft u weidere Sanktioune géint Russland
An d'Europäesch Unioun preparéiert "en urgence" weider Sanktioune géint Moskau. Dat huet d'Rootspresidence zu Bréissel am spéide Moie matgedeelt.
Um dräi Auer de Mëtteg fänkt wéinst dem Krich an der Ukrain e Spezialsommet vun den NATO-Staats- a Regierungscheffen un, dat a Form vun enger Videokonferenz.
