Ombudscomité fir d'Rechter vum Kand "Jugendlecher net vun erwuessene Prisonéier getrennt"

De President vum Ombudscomité fir d'Rechter vum Kand huet sech am Prisong zu Schraasseg e Bild vun der Situatioun gemaach. Déi Mannerjäreg wieren do faktesch net vun den erwuessene Prisonéier getrennt, kritiséiert de René Schlechter. Bei Mouvementer am Prisong kéimen déi Jonk mat Erwuessenen a Kontakt.

Serge Kesseler / cbi

René Schlechter
René Schlechter, President vum ORK (Archivphoto radio 100,7)

Bei senger Visite dësen Dënschdeg zu Schraasseg gouf de President vum ORK doriwwer informéiert, datt de Moment e Jugendleche vu 16 Joer an zwee vu 17 Joer am Prisong sëtzen. Déi Jonk wieren an engem Prisongstrakt, an deem och Erwuessener sinn, erkläert de René Schlechter. Iwwerall wou si sech innerhalb vum Prisong deplacéieren, fir zum Beispill an de Sport ze goen, géife si duerch Gäng oder Zellentrakte goen, an deenen och Erwuessener wieren. Just do, wou si residéieren, wiere si eenegermoosse getrennt, esou de René Schlechter.

Net héich kriminell

Grad wéi déi consultativ Mënscherechtskommissioun seet och den Ombudscomité fir d'Rechter vum Kand, datt et net méi zoulässeg wier, fir Jugendlecher am Prisong ze placéieren. De President René Schlechter kritiséiert, datt et net ganz transparent wier, wisou dës Jugendlecher zu Schraasseg wieren. Si wiere keng héich kriminell oder héich geféierlech Jugendlecher.

Fir Jugendlecher, déi esou geféierlech sinn, datt si net an der neier Sécherheets-Unitéit zu Dräibur (UNISEC) kéinten ënnerbruecht ginn, misst no Alternativë gesicht ginn, esou den President vum ORK. Als méigleche Fall kréich een dobäi ëmmer dee vum Terrorverdacht genannt. Et misst ee sech do eppes anescht afale loossen, wéi esou Jonker mat zwee anere Jugendlechen an der UNISEC ënnerzebréngen, esou de René Schlechter.

Net genuch Personal

An der Wochenzeitung d'Lëtzebuerger Land war de René Schlechter de virleschte Freideg schaarf kritiséiert ginn: Rieds goung vun engem Trauerspill. De René Schlechter wéisst wuel ëm déi agespaarte Jugendlecher, huet et geheescht. Hie géif sech awer net zu hirer mësslecher Lag äusseren.

De René Schlechter gëtt zou, datt säin Ombudscomité net reegelméisseg genuch Kontrollen zu Schraasseg an zu Dräibur géif maachen. Dat hätt domat ze dinn, datt si ganz vill Missiounen hätten, an datt ee mat ganz reduzéierte Moyene misst schaffen. Dëst wier eng Kritik, déi hie verstoe kéint.

Am optimale Fall misst den ORK sechs bis siwe Leit fest Personal hunn, fir sech ëm déi ënnerschiddlech Missioune kënnen ze këmmeren. De Moment géif e mat 2,5 Poste funktionéieren.


Lauschteren

Méi zum Thema

Gilbert Pregno
Jugendschutz

Et wier net acceptabel, datt ëmmer nach Mannerjäreger zu Schraasseg sëtzen. Dat wier net verhandelbar, seet de Gilbert Pregno. Jonker misste gehollef kréie, wa si mam Gesetz a Konflikt geroden.

Handschellen
Jugendschutz

Dräi Jonker ënnert 18 Joer souzen de leschte Freideg am Prisong. Dat huet de Justizministère op eis Nofro hi confirméiert. An der Sécherheetsunitéit fir Mannerjäreger si momentan fënnef Plaze beluecht.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen