De ganzen Interview mam Jean-Louis Zeien
Et wier ofgemaach gewiescht, datt d'Entreprisë sech fräiwëlleg hätte solle engagéieren, fir Mesurë fir de Respekt vun de Mënscherechter an hire Liwwerketten huelen, esou de Jean-Louis Zeien. Virop kritiséiert de Vertrieder vun der Initiativ doran d'Verhale vun de Patronatsvertrieder.
Den Haaptkritikpunkt ass d'Verschécken duerch d'Patronatsvertrieder vun engem Formular un eng Rei Lëtzebuerger Entreprisen, hannert dem Réck vun deenen anere Memberen, heescht et am Bréif vum 11. Mee un de Jean Asselborn.
"Wann ech soe Pseudo-Questionnaire, da muss ech leider hei soen, hei geet et ëm Social- a Greenwashing in Reinkultur."
Mënscherechter anhale wier kee Spill, mee ee ganz seriöen Engagement, datt ee konkret Moossnamen hëlt, fir eppes ze änneren, sou de Jean-Louis Zeien.
De Jean Asselborn an den Ausseministère géifen de Réckzuch vun de 17 NGOen aus dem Aarbechtsgrupp Betriber a Mënscherechter bedaueren, huet et de Méindeg op eis Nofro hi geheescht. Wéinst der Visitt vum däitsche President a wéinst dem NATO-Sommet wier een Interview zum Theema leider net méiglech, esou de Ministère.