Steieren Tripartite-Accord wäerten de Staat 2024 ronn 850 Milliounen Euro kaschten

D'Finanzministesch Yuriko Backes preziséiert awer, dee Chiffer géif sech just op déi steierlech Mesurë bezéien. Wann een déi staatlech Energie-Subventioune matrechent, géifen nach 350 Milliounen Euro dobäi kommen.

"Dat muss nach am Detail gekuckt ginn, mee dat ass een ordre de grandeur vu plus ou moins 350 Milliounen Euro. Wat mir domat maachen ass wierklech Previsibilitéit schafen, a kucken, datt mir d'Inflatioun am Grëff behalen."

De Gesamtkäschtepunkt fir de Staat läit deemno bei ongeféier 850 Milliounen Euro pro Joer. Déi wuel deierst Mesure an dem Package ass, datt de Steierbarème deelweis un d'Inflatioun ugepasst gëtt. Dëst Joer kréien d'Leit déi Upassung iwwer e Steierkredit ausbezuelt. Wéi vill een ze gutt huet, hänkt dovun of, wéi vill ee verdéngt. D'Finanzministesch erkläert, datt an der Steierklass 1 bei engem Brutto-Salaire vu 50.000 Euro d'Joer de Steierkredit plus ou moins 450 Euro d'Joer géif ausmaachen.

Zukünfteg Steiererliichterung

D'nächst Joer géif ee Steierzueler an der selwechter Situatioun duerch d'Upassung vum Barème dann esouguer vun enger Steiererliichterung vu ronn 550 Euro profitéieren, sot d'Yuriko Backes. Si seet hire Ministère wéilt an den nächsten Deeg weider Detailer dozou publizéieren, wéi héich déi steierlech Erliichterunge fir déi verschidden Akommesklassen ausmaachen.

D'DP-Finanzministesch betount awer elo schonn, datt d'Mesuren aus dem Tripartite-Accord net wäerten dozou féieren, datt d'Staatsscholden iwwer 30 Prozent vun der Wirtschaftsleeschtung wäerte klammen.

D'Yuriko Backes léisst jiddefalls keen Zweifel drun, datt d'30-Prozent-Grenz och an Zukunft misst respektéiert ginn. Hir Partei géif och am Walkampf un där Grenz festhalen.