Tripartite am Hierscht Inflatioun méi héich wéi erwaart, Index am Wanter fälleg

De Statec huet e Mëttwoch seng nei Inflatioun-Previsioune verëffentlecht: 2022 wier mat enger Inflatioun vun insgesamt 6,6 Prozent ze rechnen, 2023 géif d'Präisdeierecht sech op 5,3 Prozent belafen. Domat huet de Statec seng lescht Aschätzung no uewe korrigéiert. Wat soen d'Vertrieder vun de Gewerkschaften an Industrien dozou?

Tom Haas / sam

Inflatioun
De Statec seet datt 2022 mat enger Inflatioun vun insgesamt 6,6 Prozent ze rechnen ass. Foto: NVS my world / Bigstock

Et gesäit net esou aus, wéi wann zu Lëtzebuerg an nächster Zukunft erëm iergendeppes méi bëlleg géif ginn: D'Präisser klamme weider, virun allem déi vir Stroum a Gas.

Lauschteren

Dat wierkt sech op all déi aner Präisser aus - de Statec geet dovunner aus, datt eng nei Indextranche nach Enn dës Joer kéint erfalen an eng weider am zweeten Trimester 2023. Dëst wier zousätzlech zu där vum Juli dëst Joer, déi jo op den Abrëll 2023 verréckelt gouf.

De Xavier Bettel hat dowéinst op Twitter ugekënnegt, datt hien nach op déi aktualiséiert Zuele vum September waart, éier hien eng nei Tripartite wëll aberuffen.

OGBL: Nei Tripartite muss stattfannen

De Jean-Luc de Matteis vum OGBL begréisst dem Xavier Bettel säi Virstouss. Et misst ganz kloer eng nei Tripartite stattfannen, an den OGBL géing och soen datt si missten dobäi sinn. Do misst een dann awer och mat "seriöen Zuele" schaffen:

"(...) dat heescht, d'Employeure mussen d'Kaarten op den Dësch leeën. Wéi geet et de Betriber, wou sinn déi Betriber, déi Problemer hätten - an deene muss gehollef ginn. Awer net iwwer eng Indexmanipulatioun, mee iwwer konkret Hëllefen, déi mir da mussen zesummen diskutéieren"

Indextranchë gehéiere fir den OGBL-Zentralsekretär iwwerdeem net op d'Agenda: Den Index wier een Theema wat si net wéilte beschwätzen.

Den Index misst einfach erëm weiderlafen, well eng weider Verrécklung vun Indextranchë géif zu engem Index-Stau féieren. Doduerch géif, laut dem Jean-Luc de Matteis, d'Gefor bestoen, datt d'Employeure sech géifen drop behaapten, eng oder méi Tranchen hanne vum Dësch falen ze loossen.

LCGB: Kafkraaft vu Salariéë muss erhale bleiwen

Eng bësse méi vermëttelend Haltung huet de President vum LCGB, de Patrick Dury. Hie seet, et wier de Privatsecteur deen u sech de Räichtum zu Lëtzebuerg géing schafen:

"A mir mussen elo kucken, datt d'Kafkraaft vun de Salariéen aus dem Secteur net ënner d'Rieder kënnt, an op der anerer Säit kucken, fir d'Aarbechtsplazen am Secteur ze erhalen, fir datt mir net no dëser Energiekris an eng sozial Kris eralafen."

Den LCGB wéilt sech zum Index och nach net festleeën.

FEDIL rechent mat Indextranche um Enn vum Joer

D'Hausse vun de Präisser, virun allem am Energieberäich, kritt och d'Industrie ze spieren, erkläert de René Winkin, den Direkter vun der FEDIL.

D'Präisser an der Industrie wieren an dem leschte Joer immens séier eropgaangen, an dëse Mouvement géif och nach ëmmer lafen. D'Industrie misst struewelen, fir hir Präisser eropzesetze fir net gequëtscht ze ginn, esou de René Winkin.

Och wann e puer Präisser sech den Ament géinge berouegen, wier d'"Apräisung" a ganz ville Secteuren nach amgaang:

"Dofir gi mir dovun aus, datt, wann elo keng grav Rezessioun kënnt, d'Präisser nach eng Zäit wäerten héich sinn an datt forcément den Zenario vun enger Indextranche Enn dës Joer net auszeschléissen ass."

De René Winkin lauschteren

Den Romain Wolff vun der Staatsbeamtegewerkschaft haut iwweregens e Mëttwoch um RTL gesot, datt et keng weider Verrécklung vun Indextranchen dierft ginn.

Méi zum Thema

Gilles Baum IVD 4 August 2022
Inflatioun

D'DP wëllt weider op Steierkreditter setze fir d'Kafkraaft vun de Leit ze stäerken, seet de Gilles Baum. Hie schléisst aus, datt de Steier-Barème an der aktueller Situatioun un d'Inflatioun wäert ugepasst ginn.

Franz Fayot
Tripartite am Hierscht

Wéinst der héijer Inflatioun déi dem Statec no dëst Joer bei 6.6 Prozent kéint leien, kéint eng weider Indextranche am leschten Trimester dëst Joer erfalen. Wat seet de Wirtschaftsminister dozou?

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen