EU-SOMMET Impfstoff-Enkpass am Mëttelpunkt vun den Diskussiounen

An 19 EU-Länner klëmmt d'Zuel vun den Infektiounen, a 15 och déi vun den Hospitalisatiounen, sot gëschter d'EU-Gesondheets-Kommissärin Stella Kyriakides. Fir d'Situatioun ënner Kontroll ze kréien, wier et besonnesch wichteg, datt d'Länner genuch Impfstoff zur Verfügung hunn.

Däitschland wëllt Sputnik-Commande virbereeden

Däitschland wëllt sech um EU-Sommet dofir asetzen, datt d'Kommissioun mam russeschen Hiersteller vum Sputnik-Impfstoff ufänkt. Dat obschonn de Vaccin nach guer net an der EU zougelooss ass. Et wier wichteg, elo ze bestellen an ze wëssen, wien an der EU dorun interesséiert ass, huet et gëscht aus däitsche Regierungskreesser geheescht. Wann d'Perspektive fir een Accord mat Sputnik reell wier, wier Lëtzebuerg net dogéint, datt d'Kommissioun mat deene Gespréicher ufänkt.

Mat senger Propos de Verdeelungs-System vun de Vaccinen, déi zesummen akaaft goufen, ze iwwerschaffen, dierft den éisträichesche Kanzler iwwerdeems um EU-Sommet zimmlech eleng do stoen. Déi meescht, dorënner och Lëtzebuerg, schéngen den aktuelle System fir gutt an am Contraire zum Sebastian Kurz och fir fair ze halen.

Net onbedéngt fair wier den Ament d'Situatioun um Marché, sou stellt et allzäit d'EU-Kommissioun duer. D'EU ass d'Nummer eent am Export vun Impfstoffer, et ginn awer keng Vaccinen an d'EU importéiert, huet gëscht de Vizepresident vun der EU-Kommissioun, de Valdis Dombrovskis nach emol betount.

43 Milliounen Impfdosisse goufen zanter dem 1. Januar aus der EU an 33 verschidde Länner exportéiert. Dat weess d'EU esou genee, well zanter dem 1. Februar een Export-Mechanismus a Kraaft ass. Deem Mechanismus no mussen d'Entreprisen eng Export-Autorisatioun ufroe mussen. Ziel ass et, ze kontrolléieren, ob sech d'Hiersteller un d'Kontrakter mat der EU halen.

Export-Mechanismus ass ëmstridden

D'Kommissioun huet e Mëttwoch proposéiert, de Mechanismus bis Enn Juni ze verlängeren. E soll iwwerdeems em zwee Krittären erweidert ginn: dee vun der Proportionalitéit an der Reciprocitéit. Et soll also gekuckt ginn, ob zum Beispill net a Länner exportéiert gëtt, déi selwer vill Impfstoff hunn, oder déi net prett sinn, es an d'EU ze liwweren.

Wéi genee dat gemooss gëtt, oder awer ob dono zum Beispill Liwwerunge vun Entreprisë géifen zeréckbehale ginn, déi sech un hir Versprieche gehalen hunn, a wat mat Vaccine geschitt, déi géife gestoppt ginn, dat sinn alles Froen, déi nach op sinn.

D'Decisioune géife "cas par cas" geholl ginn, sou d'Kommissioun, EU-Diplomaten hunn e Mëttwoch vun enger "komplexer Situatioun" geschwat. Esou een net ganz previsibele Mechanismus dierft awer ënner de Staats- a Regierungscheffe fir Diskussioune suergen. Eng Partie Länner, dorënner Lëtzebuerg, si virsiichteg. D'Kommissioun betount zwar ëmmer nees, datt et sech hei net ëm een Instrument handelt, datt fir een Export-Verbuet suerge soll. Allerdéngs kéint dat vu bausse falsch verstane ginn.

De Faite, datt d'EU-Kommissioun déi Propose een Dag virum Sommet op den Dësch geluecht huet, gouf net iwwerall gutt opgeholl. D'EU-Ambassadeuren hätten den Text vum Reglement net ze gesi krut, ier en an der Ëffentlechkeet presentéiert gouf, et kéint een also um Sommet just eng éischt Appreciatioun maachen, sou eng europäesch Source.

Am Brouillon vun hire Konklusioune vum Sommet halen d'Staats- a Regierungscheffe fest, datt et wichteg ass, den Exportmechanismus ze verlängeren. Eng Decisioun doriwwer, ob d'Propose vun der Kommissioun esou ugeholl gëtt, wéi se elo virläit, wier awer net onbedéngt ze erwaarden, soten am Virfeld vum Sommet e puer EU-Diplomat. D'Detailer vum System missten nach ausgeschafft ginn.