Wéi de Bastien an de Pierre-Alexis. Déi zwee jonk Fransouse riichten all Moien an enger anerer Stad d'Barrikade vum Paddock op - deem Areal, wou d'Ekippe virum Depart mat hire Bussen hifueren.
"Mir fänke moies géint véier Auer un", erzielt de Pierre-Alexis, "a mir brauchen ongeféier zwou an eng hallef Stonn." Déi zwee hoffen awer, datt d'Aarbecht um Schluss vum Tour e gutt Stéck méi séier geet. "Et ass fir eis zwee deen éischten Tour de France. Mir léieren also all Dag bäi."
De Bastien ass am deegleche Liewen selwer Eventmanager. "Mä den Tour ass einfach esou e risegt Evenement. Ech wollt dat eng Kéier vu ganz ënne gesinn", erzielt hien. Datt hien elo fir d'Opriichte vum Paddock zoustänneg ass, wier Zoufall. "Ech hu mech op verschidde Poste gemellt. Finalement gouf ech vun enger Entreprise, déi den Tour-Organisateur A.S.O. ënnerstëtzt, engagéiert."
Hien ass zefridde mat där Aarbecht. "Fir d'Ekippen ass dat jo näischt neits. Déi hunn eng Roadmap, do ass de Wee souwisou agezeechent. Mä fir d'Spectateuren oder d'Invitéen ass et praktesch." Et kéim reegelméisseg vir, datt Leit an den ofgespaarte Beräich fueren. Dat z'evitéieren, wier hir Aarbecht.
Strikten Zäitplang
Mä och déi Responsabel vun der Gemeng Munneref si fir den Depart vum Tour fréi opgestanen. "Mir stinn zënter véier Auer de Moien hei", erkläert de Christophe Lampach vum Service technique vun der Gemeng. "Mir spären d'Stroossen of a këmmeren eis ëm alles, wat net Deel vun der offizieller Ville de Depart ass."
Och d'Gemeng kritt kloer Richtlinne virginn, un déi se sech muss halen. "Gëschter um 18 Auer huet d'A.S.O. eis matgedeelt, wéi mir d'Markéierungen um Parking virum Casino musse maachen." Op där Plaz entsteet an de fréie Moiesstonnen d'Duerf vum Depart, wou Press, Catering an Invitéen ënnerbruecht ginn. "Da kenne si direkt ufänke mat opbauen. A nom Depart dauert et knapps véier Stonnen, dann ass de ganzen Trupp erëm fort." Nëmmen eng Stonn dauert et, bis d'Stroossen nees fräi sinn.
Fir de Bastien an de Pierre-Alexis geet et dann an de Camion. Am Nomëtteg si si dann zu Vittel, wou d'Etapp haut ukënnt a muer den Depart ass. Géint véier Auer moies geet hir Aarbecht dann nees vu vir un.
