Horesca Hallschent vun Horeca-Betriber hu keng Hëllef ugefrot

Lauschteren

Et wier de Läit hiert gutt Recht ze manifestéiere fir op déi schwiereg Situatioun am Secteur vun de Cafetieren a Restaurateuren opmierksam ze maachen. Et kéint een dat gutt verstoen, wann dat ziviliséiert géif oflafen, betount de Generalsekretär vun der Horesca, der Federatioun vun den Hotellen, Restauranten a Caféen.

Hie kéint d'Kritik net gëlle loossen, datt de Staat näischt géif maachen, oder datt d'Horesca hir Aarbecht net géif uerdentlech maachen.

"Dat ass onfair, dat si Leit, déi sech net iwwer déi méiglech Hëllefen informéiert hunn, déi et ginn. Am Fong hätte mer 2.600 Betriber, déi Hëllefe kéinte kréien. Mee all Kéier wa mer den Decompte gemaach kréie vun de Betriber, déi eng Demande op Hëllefen aus dem Relance-Pak agereecht hunn, si mer knapps bei der Hallschent."

Finanziell Ënnerstëtzung fir kleng a grouss Betriber

Wärend dem éischte Lockdown hat een Horesca-Betrib een Urecht op verschidden Hëllefen, erkläert de François Koepp.

"Fir Betriber mat bis zu 20 Mataarbechter huet de Staat zwee Mol 5.000 Euro bezuelt, derbäi kënnt eng Hëllef fir Onofhängeger, déi tëscht 3.000 a 4.000 Euro läit. Betriber mat maximal 20 Mataarbechter kruten och 12.500 Euro.

"Wärend dem Lockdown ass u weideren Hëllefe geschafft ginn. Engersäits gouf d'Hëllef Aide de relance et de solidarité ageféiert. Pro Salarié dee geschafft huet, krut de Betrib 1.200 Euro, a fir Salariéen, déi am Chômage partiel sinn, kommen 250 Euro derbäi."

Nei Ënnerstëtzung betrëfft déi ongedeckte Käschten.

Je no Gréisst vu Betrib a Verloscht un Ëmsaz, ginn all déi Depensë couvréiert, déi een net konnt bezuelen, betount de François Koepp.

"Bei der Aide pour frais non couverts kritt ee Betrib mat bis zu 50 Mataarbechter 90 Prozent vun de fixe Käschte gedeckt, ënner anerem och de Loyer. Méi grouss Entreprisë kréie 70 Prozent vun deene Fraise rembourséiert. Dat heescht sämtlech Fraise Salairen, Loyeren, oder nach Gas a Stroumrechnunge sinn abegraff. Eng wichteg Hëllef ass de Chômage partiel. Den Horesca-Secteur war virun der Pandemie net eligibel fir de Chômage partiel, d'Horesca huet sech derfir agesat, fir datt dat kann de Fall sinn."

Et wiere vill Hëllefe fir Caféen a Restaurante virgesinn, mee et misst ee se ufroen, esou de François Koepp. Eng Ënnerstëtzung fir d'Formulairen auszefëlle gëtt et bei der Horesca oder der Chambre de commerce. Déi, déi nach keng Demande agereecht hunn, kënne fir d'Méint Juni bis November bis de 15. Februar déi Demarche nohuelen.

Loyer Erhéijung Ufanks vum Joer

Verschidde Brauereien hunn ufanks vum Joers, sou wéi dat am Kontrakt stoung, eng Erhéijung vum Loyer gefuerdert, bedauert de François Koepp.

"Dat fanne mir ee Skandal. Dat ass eng Frechheet, fir dat an engem Joer ze maachen, wou een esou vun der Kris getraff gëtt. Wann d'Caféeen a Restauranten op gewiecht wieren, dann hätte mer näischt gesot. Hei hätt awer d'Mënschlechkeet kënnen do sinn an d'Brauereien hätte kënne soen, si géifen déi Klausel am Kontrakt net applizéieren."