Ukrain-Kris Grouss Militärmanöveren tëschent Russland a Belarus

Déi grouss Militärmanöver tëschent Russland a Belarus hunn ugefaangen, zu engem groussen Deel ganz no un der Grenz tëschent Belarus an der Ukrain. Do gëtt weiderhi gefaart, datt dës Exercicer zu enger Invasioun vun der Ukrain kéinte féieren.

Philip Crowther (Teschernobyl, Ukrain) / cbi

Tschernobyl
Foto: Philip Crowther

Experte soen, datt elo schonn iwwer 135.000 russesch Zaldote laanscht der ukrainescher Grenz positionéiert sinn. Sollt et zu engem Ugrëff kommen, dann ass d'Grenz tëschent Belarus an der Ukrain eng logesch Plaz: d'Haaptstad Kiew ass just iwwer 100 Kilometer ewech. D'russesch Arméi misst duerch eng ganz bekannte Plaz marschéieren. Déi heescht Tschernobyl.

Eng roueg Stad

Schonn zanter 1986 ass et roueg ginn an der Stad Pripyat, wou déi ganz Bevëlkerung evakuéiert gouf an ni zeréckkoum. Et ass ze geféierlech, ze radioaktiv. Och bal 36 Joer no der Atomkatastroph just niewendrun an der Stad Tschernobyl.

Och déi Stad gouf evakuéiert, mee e puer Dausend Leit wunnen elo nees hei, dorënner eng Fra, déi als Guide Leit an d'Evakuatiounszon bréngt.

"Ech weess net genee wat mech ugezunn huet, mee wou ech hei eng Visitt gemaach hunn, do hunn ech en Deel vu mengem Häerz hei gelooss. Ech kann et net erklären, ech weess net firwat et geschitt ass, mee ech hunn dës Plaz immens gär. Ech si frou hei."

Si wëllt anonym bleiwen, fir esou fräi iwwer Politik schwätzen ze kënnen. Si fiert all Dag vun Tschernobyl aus an déi nächst Stad - ee klengen Deel vum Trajet féiert si duerch Belarus.

"Dat ass ee politescht Spill"

Theoretesch wier dëst eng ideal Plaz, wou dem Wladimir Putin seng Truppe kéinten ugräifen - änlech wéi am Donbas virun aacht Joer, wou och haut nach Krich ass. "Mir wëssen, wat am Oste vum Land lass ass", zielt d'Guide, hire Brudder wunnt zu Donetsk. "Ech mengen awer net, datt de Wladimir Putin méi wäit an d'Land wëllt", esou d'Aschätzung vun der Fra.

Foto: Philip Crowther

Selwer wéisst si net, wat genee op der Grenz lass ass. "Ech mengen, et ass just e politescht Spill, et mécht mech net nervös", zielt d'Fra. Si géif sech éischter Suergen ëm d'Wärung maachen, a wéi deier de Bensinn an Iesswuere sinn, an dat obwuel Dausend russesch Zaldote just e puer Dose Kilometer wäit fort stationéiert sinn.

"Mir schwätzen iwwert eist Liewen"

Déi ukrainesch Arméi huet virun e puer Deeg an der radioaktiver Zon trainéiert. Dat wier falsch, mengt d'Fra aus Tschernobyl: et wier eng friddlech Plaz, wou net geschoss soll ginn. Et sollt ee probéieren net ze vill doriwwer nozedenken.

"Nee, mir schwätzen iwwer eist Liewen, net nëmmen iwwer Krich oder Politik. Wa mir eng Fläsch Wäin opmaachen da schwätze mer iwwer eis Kanner, eis Liewen, a net nëmmen iwwer Krich. Ganz éierlech."

Si seet, si géif hiert Land ni verloossen: Zu Tschernobyl huet si sech verléift, an der Stad niewendrun ass si bestuet ginn. Elo soll net nach eng weider Tragedie an dës Géigend kommen.

Zu Pripyat gesäit een, wéi d'Zukunft vun der Sowjetunioun sollt ausgesinn, eng fonkelnei Stad fir déi Leit, déi um Reakter geschafft hunn. Elo héiert ee just nach de Wand.

An der Mediathéik:

Europa Aktuell / / Philip Crowther
Lauschteren

Méi zum Thema

Yehor Soboliev 1
Portrait

Déi ukrainesch Arméi bereet sech op eng Invasioun vu russeschen Truppe vir. Mee och Zivilisten am Land preparéiere sech. Eise Korrespondent Philip Crowther ass engem vun hinne begéint.

Net verpassen

  • BEAUTIFUL DECAY Festival

    Beautiful Decay Festival.jpg

    Vum 28.-29. Mee ass den BEAUTIFUL DECAY Festival am Gréiweschlass zu Käerch. De radio 100,7 ass e Samschdeg den 28.05. live sur place.

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen