Corona-Kris François Bausch fuerdert Restriktiounen am Privaten

Nodeems d'Zuel vu confirméierten neien Infektioune mam Coronavirus an de leschten Deeg zu Lëtzebuerg nees däitlech geklommen ass, géif d'Regierung drun denke fir d'Gesetz nees ze verschäerfen, seet de Vizepremier François Bausch. Eng héich Ustiechungsgefor géif et dem François Bausch no ënner anerem bei private Partye ginn.

Rick Mertens (Interview) / Jean-Claude Franck, Claude Biver (Web)

François Bausch
De François Bausch (déi gréng) ass Vizepremier a Minister fir bannescht Sécherheet

D'Regierung hätt vun Ufank un och nom État de crise wëlle Restriktiounen am private Beräich bäihale fir d'Zuel vu Leit, déi een doheem empfänken däerf, weider ze limitéieren. Wéinst enger formeller Oppositioun vum Staatsrot gouf dat dunn awer net festgehalen.

Elo hätt d'Situatioun sech nees geännert, esou de François Bausch, an dofir misst d'Regierung sech iwwerleeën, ob een net "besser Argumenter" hätt fir dat ze justifizéieren an de Staatsrot ze iwwerzeegen, fir do "erëm eng Barrière" anzesetzen. Et kéint net sinn, datt ee sech dee gudde Bilan géif "versauen", esou de Vizepremier François Bausch.

Amendementer an der Chamber

D'Regierung géif ganz sécher nach méi an d'Ëffentlechkeet goen, esou de François Bausch, an et wiere parlamentaresch Amendementer un de Covid-Gesetzer néideg. Dat géif e Mëttwoch am Regierungsrot diskutéiert ginn: "Mir musse verstoen, wéi dee Virus funktionéiert".

E géif sech séier an zouene Raim iwwerdroe ginn, wou wéinst der Musek haart geschwat gëtt, wou gesonge gëtt, wou gedanzt gëtt. Dat misst een elo op der Säit loosse fir sech dat normaalt Alldagsliewe wéinst dem Virus net ze versauen, esou de François Bausch.

Risiko Nuetsliewen

Zum Deel géifen d'Leit sech un d'Hygiènesmesurë wéinst dem Coronavirus halen, zum Deel net, esou de grénge Vizepremier François Bausch, och Minister fir bannescht Sécherheet. Et géif hien net iwwerraschen, datt grad am Nuetsliewen eng Infektiounsgefor géif bestoen. De Virus wier jo och ënner anerem op Partyen am Schigebitt Ischgl verbreet ginn.

D'Police géif 30 Kontrollen den Dag maachen: "D'Police ass present, mee se kann net iwwerall zur selwechter Zäit sinn", esou de François Bausch. Et misst ee sech och iwwerleeën, ob ee sech net nach méi Moyenen am Gesetz gëtt. Et kéint net sinn, datt ee sech de gudde Bilan bis elo verdierft, wéinst e puer esou groussen Evenementer op enkem Raum.

Geziilt handelen

De grénge Minister François Bausch seet, de Staat misst kënne geziilt handelen, wann nei Infektiounsplazen entstinn. Dofir misst vill getest ginn, an et wier wichteg, datt d'Santé d'Ëmfeld vun de Leit mam Virus séier retracéiert. Et kéint een d'Gesellschaft net nach eng Kéier an e komplette Lockdown setzen. Dofir misst jiddweree sech elo un d'Hygiènesmesuren halen.

Majoritéitsparteie momentan net op enger Linn, fir d'Reegelen am private Beräich ze verschäerfen

An de leschten Deeg goufen et hei am Land jo erëm méi héich Infektiounszuelen. Eng héich Ustiechungsgefor géif et dem Minister François Bausch no ë. a. bei private Partye ginn, an d'Regierung géif un eng Verschäerfung vum Gesetz denken.

Den DP-Fraktiounschef huet sech iwwerrascht gewisen iwwer dem grénge Vize-Premier seng Fuerderung. Een neien Agrëff an d'Privatliewe vun de Leit wier problematesch, esou de Gilles Baum.

Wann eng nei Verschäerfung sech op Basis vun den Zuelen imposéiert, da soll een dat maachen, esou dogéint den LSAP-Fraktiounschef Georges Engel. Och déi gréng Fraktiounscheffin Josée Lorsché ënnerstëtzt de Virstouss, erëm méi streng ze ginn fir eng "grouss Katastroph" ze evitéieren.

An der Mediathéik:

Invité vum Dag / / Rick Mertens
Lauschteren

Méi zum Thema

Jean-Claude Schmit
Corona-Pandemie

D'Santé wier "e bëssen iwwerrascht" iwwer d'Rapiditéit, mat där d'Corona-Infektiounen nees geklomme sinn, esou de Jean-Claude Schmit. Pro Dag kéint een d'Kontakter vun enge 60 Leit retracéieren.

COVID-19 Test
Corona-Pandemie

44 Leit goufen hei am Land bannent engem Dag positiv op de Coronavirus getest. Dat ass déi stäerksten deeglech Hausse zanter dem 21. Abrëll. Bannent de leschte 24 Stonnen goufen iwwer 4.217 Tester gemaach.

Ulf Nehrbass
Corona-Pandemie

Et wier méiglech, datt Lëtzebuerg um Ufank vun enger zweeter Well steet, seet den Ulf Nehrbass. Dofir wier et wichteg, datt d'Massentester gemaach ginn, fir esou d'Infektiounsketten ze ënnerbriechen.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Net verpassen

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen