Politesch Reaktiounen op US-Attack François Bausch: "Eigentlech net akzeptabel"

De Lëtzebuerger Verteidegungsminister zweiwelt drun, datt d'US-Arméi dat internationaalt Recht respektéiert huet, wéi se den iranesche Generol Qasem Soleimani ëmbruecht huet. De François Bausch seet, d'Approche vum amerikanesche President wier "eigentlech net akzeptabel".

Rick Mertens / cz

François Bausch

De Verteidegungsminister vun déi gréng betount, et wier bis elo net kloer, firwat d'amerikanesch Arméi den iranesche Generol Soleimani an der Nuecht op e Freideg attackéiert huet.

Och an den USA géifen d'Grënn fir dës Aktioun a Fro gestallt ginn, och vu Militärexperten. "Well et ass jo am Fong eng Hiriichtung, déi do gemaach ginn ass. Op Basis vu wat fir engem internationale Recht ass déi da gemaach ginn?"

Eng Fro, op déi et bis elo keng Äntwert gëtt, fënnt de François Bausch. Hie betount, datt d'Defense do wier fir d'Prinzippie vum Rechtsstaat ze verteidegen. Militäresch Mëttele sollten nëmmen agesat ginn, wann d'internationaalt Recht, oder demokratesch Grondwäerter a Gefor wieren.

Genee wéi den Ausseminister rifft dofir och de Lëtzebuerger Verteidegungsminister zur Deseskalatioun op. Den CSV-Deputéierte Claude Wiseler fënnt dës Positioun vun der Regierung grondsätzlech richteg. Hien insistéiert awer, datt och déi zoustänneg Chamberkommissioun misst iwwer d'Situatioun informéiert ginn.

D'CSV hätt dofir gefrot, datt de Sujet op den Ordre du jour vun der zoustänneger Chamberkommissioun gesat gëtt. "Mir kommen iwwerhaapt net dolaanscht", sou de Claude Wiseler.

Den EU-Deputéierte Charel Goerens geet iwwerdeems dovun aus, datt och d'Europaparlament an den nächsten Deeg zur Deseskalatioun oprifft. Den DP-Politiker betount awer, datt d'EU just e limitéierten Afloss op déi aktuell Situatioun am Noen Osten hätt. "D'Europäesch Unioun kann héchstens hoffen, datt bei den amerikanesche Walen eppes anescht erauskënnt, wéi dat, wat viru véier Joer de Fall war", sou den EU-Parlamentarier.

Méi zum Thema

Protester Irak picture alliance Ameer Al Mohammedaw dpa
Demonstratiounen am Irak

D'Protester am Irak, déi sech op d'Haaptstad Bagdad konzentréieren, mee och a verschiddene Stied am Süde vum Land ausgebrach sinn, hu bis ewell iwwer 100 Doudesaffer gefuerdert a méi wéi 6.000 Blesséierter.

Protester Irak 1 dpa
Noen Osten

D'Zuel vun den Doudesaffer zu Bagdad ass den Donneschdeg op iwwer 20 eropgeklommen, mat méi wéi 1.200 Blesséierten. Grond fir d'Manifestatiounen, déi iwwerraschend séier gewuess sinn, sinn d'Aarbechtslosegkeet an d'Korruptioun.

Programm

Praktesch Infoen

  • Nei Serie: Wellbeing

    Wellbeing

    Bleift gesond a monter zesumme mam 100,7. An eiser neier Serie "Wellbeing" wëlle mir Iech an dësen Zäite mat wäertvollen Informatiounen a Rotschléi begleeden. 

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen