Russland-Krich Flucht aus der Ukrain: Plaz dringend gesicht

Dem leschte Rapport vun der UNO no si bis ewell eng 600.000 Ukrainer op der Flucht virum Krich, an d'Zuel geet weider an d'Luucht. Ongeféier d'Hallschent ass am Nopeschland Polen ënnerkomm. Wéi vill Flüchtlingen hei op Lëtzebuerg wäerte kommen, wier de Moment schwéier ofzeschätzen, heescht et aus dem Ausseministère. Mee éischt Famille si schonn ukomm an d'Preparatioune lafen op Héichtouren, virop d'Sich no Plaze fir ze liewen.

Christiane Kleer / cbi

E Kand op der Flucht virum Krich an der Ukrain
E Kand op der Flucht virum Krich an der Ukrain. Foto: picture alliance / NurPhoto | Beata Zawrzel

Vill Plaz ass net: ronn 4.200 Better ginn et an de Lëtzebuerg Strukture fir de sougenannte Primoaccueil. De leschten 31. Dezember waren dovun netto ronn 94 Prozent beluecht. D'Rout Kräiz ass nieft dem Staat ee vun de groussen Acteuren am Beräich vum Accueil.

Déi Responsabel Nadine Conrardy mécht wéinst dem aktuelle Plazmangel een Appell, datt Leit, déi Strukturen hunn - am beschte méi grouss Strukture wéi Halen oder Hoteller - sech beim Ausseministère oder beim ONA melle sollen, et géifen nach Plaze gesicht ginn.

Déi normal Strukture wiere schonn iwwerfëllt, "dat heescht och do si mer scho vir bäi an hanne widder". D'Rout Kräiz rechent domadder, datt nach vill Läit dobäi kommen.

Strukture fir d'Ënnerbrénge vu Flüchtlingen

De Manktem u Logement fir Demandeure vun internationalem Schutz a Refugiéë mat Statut ass net nei. Ongeféier 45 Prozent vun de Persounen, déi aktuell a sou Strukture liewen, hunn de Statut a kéinten eigentlech eraus.

Mee d'Gemengen di sech scho méi laang schwéier fir entspriechende Wunnraum unzebidden. Ganz aktuell an der Ukrain-Kris deet sech awer eppes, heescht et vum Syvicol-President Emile Eicher.

Beispillsweis hätt den Ettelbrécker Buergermeeschter Jean-Paul Schaaf drun erënnert, datt de Lycée agricole aktuell eidel géif stoen. Weider misst de Staat kucke wat fir ëffentlech Gebaier aktuell net benotzt géife ginn.

Gëschter huet de Syvicol een Opruff un d'Gemenge gemaach fir Liewensraim ze mellen. Och Hoteller, déi eidel stinn, si schonn op der Lëscht.

D'Hëllefsbereetschaft ass grouss

D'Solidaritéit wier immens grouss, seet den Emile Eicher. Hie gesäit eng aner Ouverture wéi nach 2015 am Kader vum Syrie-Krich.

"Dat ass een aner Kulturkrees, deen eis vläicht méi no steet. Ech menge wat eis awer och wichteg ass, dat ass de Message vun der Regierung, mir huelen déi Leit ouni gréisser Prozeduren."

Fir d'Nadine Conrady vun der Croix Rouge gëtt et keen Ënnerscheed zu 2015. Deemools, wéi elo, wier d'Hëllefsbereetschaft grouss.

Si réit awer den Ament dovun of, ukrainesch Primoarrivante privat ënnerzebréngen: et wieren aktuell nach vill Froen ze klären: "Zum Beispill iwwer de Statut, do muss op europäeschem Niveau gekläert ginn ob se eventuell eng temporär Protektioun kréien:"

Wa Leit, déi virum Krich an der Ukrain flüchten elo privat géifen ënnerbruecht ginn, wier et schwéier de Suivi ze maachen an hinnen déi néideg Informatioune mat op de Wee ze ginn, mengt d'Nadine Conrady.

Éischt Famillje si schonn zu Lëtzebuerg ukomm

Sachspende wäerten op laang oder kuerz Dauer och gebraucht ginn, nach ass et schwéier genee ofzeschätzen, wat a wéi vill. D'Nadine Conrardy nennt de Centre de tri, deen d'Rout Kräiz an d'Caritas zu Léiweng bedreiwen, als Ulafstell fir Donen.

Éischt Familljen aus der Ukrain si schonn hei am Land ukomm. Wéi vill a wéini der nokommen ass onkloer. D'Croix Rouge ass en attendant och op der Plaz aktiv an d'Organisatioun këmmert sech och hei am Land drëm gespléckte Famillen erëm zesummenzeféieren:

"Och zum Beispill Kanner, mir hu schonn héiere vu Situatiounen, wou Kanner mat anere Famille fortgeschéckt goufen, well de Papp vläicht huet missten do bleiwen an d'Mamm net an der Géigend war. Do wäert et also net nëmmen ëm Pappe goen, mee och ëm Kanner, déi eventuell eleng ënnerwee sinn."

Och dat wäert mëttelfristeg een Theema ginn, sou d'Nadine Conrardy, genausou wéi d'Scolariséiere vun de Kanner, déi hei ukommen, déi séier wäert mussen organiséiert ginn.

An der Mediathéik:

Aktuelles / / Christiane Kleer
Lauschteren

Méi zum Thema

Frank Wies
Fräie Mikro

Déi russesch Attack op d'Ukrain soll eis net nëmme betraff maachen, mee all Bierger dozou beweegen, méi genee ze kucken, wéi eng Konsequenzen d'Politik vun eisem Land huet, mengt de Frank Wies a sengem Fräie Mikro.

Boris Bilan ënnerwee op d'ukrainesch Grenz
E Lëtzebuerger ënnerwee op d'ukrainesch Grenz

De Boris Bilan ass zanter gëschter Owend ënnerwee fir vum Houwald aus op déi polnesch-ukrainesch Grenz ze kommen. Voll gepaakt bis uewenhi wäert hien Donen an ee Spidol bréngen. Um Réckwee wëllt hien Ukrainer mat op Lëtzebuerg bréngen.

Demonstratioun Ukrain
Op der Clairefontainesplaz

Wéi op villen anere Plazen an Europa, gouf haut och hei zu Lëtzebuerg géint de Krich an der Ukrain demonstréiert. Eng Associatioun vun Ukrainer, déi hei am Land liewen, hat fir de Moien zu enger Friddensdemo op der Clairefontainesplaz an der Stad opgeruff.

Net verpassen

  • BEAUTIFUL DECAY Festival

    Beautiful Decay Festival.jpg

    Vum 28.-29. Mee ass den BEAUTIFUL DECAY Festival am Gréiweschlass zu Käerch. De radio 100,7 ass e Samschdeg den 28.05. live sur place.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen