Ukrain-Krich Evakuatiounen viru méigleche russeschen Ugrëff
Gouverneuren an den Donetsk a Luhansk Regiounen an der Ukrain hu Leit opgeruff den Oste vun der Ukrain ze evakuéieren. Russesch Ugrëff kéinten an deenen nächsten Deeg do méi intensiv ginn.
D'Defaite vun der russescher Arméi an de Viruerter vun der Haaptstad Kiew huet en neit Kapitel am Krich ervirbruecht. All Experte sinn sech eens - an d'NATO, an d'ukrainesch Arméi si sech eens - datt Russland sech elo op den Oste konzentréiere wëll.
Evakuatiouns-Zich sollen an de Westen fueren
Verschidden Truppen, déi aus dem Norden zeréckgezu goufen, ginn och an noer Zukunft an den Oste geschéckt.
Am Donbas ass schonn zënter 2014 e Krich tëscht der ukrainescher Arméi a pro-russesche Separatisten amgaangen. Elo wëll de russesche President Wladimir Putin gréisser Deeler vun där Géigend ënner seng Kontroll kréien. An de respektive Regiounen Donetsk a Luahsnk goufen d'Awunner elo opgeruff ze evakuéieren, mat private Mëttel ier datt et an Zukunft villäicht net méi méiglech ass.
An der Regioun Luhansk goufen um Mëttwoch iwwer 1.000 Leit evakuéiert. Méi vun deene Couloire sollen och haut vun Ziviliste benotzt ginn, esou d'ukrainesch Regierung. Och Evakuatiouns-Zich sollen haut aus der Regioun Donetsk an de Weste fueren.
Russesch Truppen loossen Convoien vum Roude Kräiz net eran
Fir aus der ëmkämpfter Stad Mariupol erauszekommen ass et méi schwéier. Iwwer 1.000 Leit hunn et trotzdeem gëschter gepackt vun do ze flüchten. Eleng, ouni e Convoi vum Internationale Roude Kräiz. Si soen, datt et onméiglech ass an d'Stad eranzekommen an datt si et schonn zënter e Freide probéieren. Hir Convoie gi vu russeschen Truppen net eragelooss. Nach eng 160.000 Ziviliste wieren zu Mariupol, esou de brittesche Renseignement.
Den ukrainesche President Volodymr Zelenskyy huet iwwerdeems nach eng Kéier en Opruff gemaach fir méi Waffen aus dem Weste geschéckt ze kréien. D'Arméi ass prett ze kämpfe mee bräicht Hëllef. De Mangel un neie Waffen an déi schwaach europäesch Sanktiounen, aus der ukrainescher Siicht, ginn de Russen d'Erlabnis fir am Osten nach eng Kéier unzegräifen.
Méi zum Thema
Liwwerstopp vu russeschem Gas ass e "Katastrophenzenario"
De Statec huet nach net ausgerechent, wéi vill d'Lëtzebuerger Betriiber géifen drënner leiden, wann se an de nächste Woche komplett op Gas aus Russland misste verzichten.
Sanktioune géint Russland: EU-Parlament wëll méi wäit goen
Am Europaparlament setzt sech eng blo-rout-gréng Allianz dofir an, datt d'EU kee Gas, Pëtrol oder Kuel aus Russland méi bezitt. Dozou gehéieren och d'Vertrieder aus de Lëtzebuerger Regierungsparteien.
"All Dag hei ass anescht"
Zanter bal engem Mount gëtt et um Kierchbierg e Sammelpunkt fir Spenden, déi an d'Ukrain bruecht ginn. Déi éischt Deeg wier d'Resonanz riseg gewiescht soen d'Organisateuren. Déi lescht Woch wier et awer zu engem Abroch bei de Spende komm.
Als Benevole un der Grenz zur Ukrain
A ganz Europa si wéinst dem Krich an der Ukrain Benevoller am Asaz. Ee vun hinnen ass de Matthieu Hansen. Eigentlech Student zu Wien huet hien déi lescht Wochen enger ONG gehollef, Flüchtlinge vun der ukrainescher Grenz op Wien ze bréngen.
