Bestellung vu Vaccinen Europäesch Bestellunge kommen als éischt drun
D'EU-Kommissioun wéisst näischt iwwer zousätzlech Kontrakter tëschent EU-Memberlänner an Impfstoffproduzenten, seet d'Sandra Gallina, Generaldirectrice vum Gesondheetsdepartment vun der EU-Kommissioun. Si stoung den Europadeputéiert Ried an Äntwert.
Si hätt keng esou Kontrakter gesinn, seet d'Sandra Gallina. Sollte se awer existéieren, wier et kloer, datt d'Commanden, déi op europäeschem Niveau gemaach goufen, fir d'éischt un d'Rei kommen. Dat hätten déi concernéiert Pharmaentreprisen der Kommissioun op Nofro zougeséchert.
Kontradiktoresch Aussoen
Hir Aussoen stinn a Kontradiktioun zu aneren Informatiounen. D'EU-Länner hu sech bannent der Europäescher Impfstrategie dozou verflicht (Artikel 7), net separat mat Entreprisen Kontrakter ze maachen, mat deenen d'EU-Kommissioun am gaangen ass ze verhandelen.
Den däitsche Gesondheetsminister Jens Spahn hat widderhuelt ëffentlech gesot, Däitschland hätt mat der Firma BioNTech den Akaf vun 30 Milliounen extra Dosissen ofgemaach. Och déi portugisesch Gesondheetsministeren hat déi lescht Woch gesot, eenzel Memberlänner hätten fir sech mat Entreprise verhandelt.
Kommissioun freet Kloerheet vun de Memberlänner
E Méindeg hat ee Spriecher vun der EU-Kommissioun gesot, d'Gesondheets-Kommissairin Stella Kyriakides géif ee Bréif un all d'Memberlänner schécken, mat der Demande genee Informatiounen iwwer hir eventuell Relatiounen mat deenen Entreprisen ze ginn, bei deenen d'EU Impfstoff bestallt huet.
D'EU hätt vun deene sechs Entreprisen esou vill kaf, wéi ugebuede gouf, sou och d'Sandra Gallina op Nofro vun den Deputéiert. Si huet op Kritik reagéiert, datt d'EU net genuch Vaccin akaaft huet.
Transparenz bei de Kontrakter
D'Deputéiert froen zanter Laangem méi Transparenz - elo solle si Abléck an déi Kontrakter kréien. Bis elo ass awer just eng Firma domat averstanen: den däitschen Impfstoffproduzent Curevac. Vun dëser Woch un ass an engem Liesraum an der Kommissioun de Kontrakt ze gesinn.
Scho vum zweete Quartal soll genuch Impfstoff do si fir all d'Europäer ze impfen. Genee Zuelen, wéi ee Land wéi vill Impfstoff wéini kritt, huet d'Sandra Gallina net genannt. D'Länner sollen awer elo zweemol an der Woch der Gesondheetsagence mellen, wéi vill Leit geimpft goufen.
Hei kann een dee ganzen Echange mam Europaparlament nach eng Kéier kucken:
Méi zum Thema
Lëtzebuerg: Moderna-Vaccin soll e Méindeg kommen
Lëtzebuerg gëtt warscheinlech als éischt EU-Land mam neie Corona-Vaccin vu Moderna beliwwert. Dat sot d'Gesondheetsministerin gëschter Owend. Si huet och ee 5-Phasen-Impfplang virgestallt.
Impfstoff-Akaf: D'EU mécht hiren eegene Succès futti
Fränk Engel: D'EU hätt méi aggressiv missen akafen
Den CSV-President Fränk Engel hat mat Kritik iwwer d'europäesch Strategie beim Impfstoff op sech opmierksam gemaach: bei all Impfstoffproduzent hätt misse fir déi ganz EU-Populatioun akaaft ginn.
Europäesch Medikamentenagence approuvéiert Moderna-Vaccin
Déi europäesch Medikamentenagence EMA huet mam Impfstof vu Moderna en zweete Corona-Vaccin approuvéiert. Elo muss d'EU-Kommissioun nach zoustëmmen, ier e kann verdeelt ginn.
