NOM EU-SOMMET EU-Budget: Europaparlament kéint Nee soen

Fir datt den EU-Budget a Kraaft triede kann, muss d'Europaparlament säin Accord ginn. Ob dat geschitt, ass awer nach guer net sécher. En Donneschdeg gëtt iwwer eng Resolutioun ofgestëmmt, an dat kéint spannend ginn. Och d'Reaktioune bei de Lëtzebuerger Europadeputéiert sinn éischter skeptesch.

Danièle Weber (Bréissel) / cbi

Europaparlament
Foto: EP / Pietro Naj-Oleari (Archiv)

Nom Duerchbroch gëscht um EU-Sommet iwwer ee Finanzpak vun 1,8 Billiounen Euro sinn d'Diskussiounen doriwwer nach net eriwwer. Fir datt den EU-Budget vun 2021 un a Kraaft triede kann, muss d'Europaparlament säin Accord ginn.

Resolutioun: Accord an der aktueller Form gëtt net akzeptéiert

Ee Jo vum Parlament ass awer nach net an dréchenen Dicher. D'Parlament géif et begréissen, datt d'Staats- a Regierungscheffen sech iwwer ee Plan de relance eens gi sinn, fir de Länner aus der Kris ze hëllefen, heescht et am Brouillon vun enger Resolutioun, iwwer déi en Donneschdeg ofgestëmmt gëtt.

Allerdéngs steet do och dran: "D'Parlament akzeptéiert de politeschen Accord iwwer de pluriannuelle Budget 2021 bis 2017 an der aktueller Form net."

An éischte Reaktiounen hu sech eng ganz Partie Europadeputéiert effektiv enttäuscht gewisen iwwer den Accord, deen d'Staats- a Regierungscheffen en Dënschdeg de Moien no deeglaange Verhandlunge fonnt haten.

Kierzunge bei Zukunftsprojeten

Grënn dofir gëtt et der eng ganz Partie. Zum Beispill deen, datt d'Rabatter op déi national Contributioune fir den EU-Budget ze fidderen, vun deene verschidden EU-Länner profitéieren, bäibehale ginn.

D'Parlament wollt déi lass ginn. Elo goufen se am Contraire deels verduebelt, reegt sech de Marc Angel vun de Sozialisten op.

"Et war gesot, déi Rabatter, déi op d'Madamm Thatcher zeréckginn, géifen elo ofgeschaaft ginn. Elo gi se och nach erhéicht!"

Fir déi Hausse ze finanzéieren, gouf op anere Plazen de roude Bic am Budget ugesat. Ee Posten am Fonds de Relance, fir de Gesondheetsprogramm "EU4health", eng Äntwert op d'Corona-Kris, ze finanzéieren, gouf ganz gestrach.

An Zäite vun enger sanitärer Kris wier dat net akzeptabel, fënnt déi gréng Europadeputéiert Tilly Metz. Och bei den Investissementer an d'Recherche an de Kampf géint de Klimawiessel oder an d'ländlech Entwécklung gouf gekierzt. Domat hätt de Fonds de relance, deen offiziell den Titel "Next Generation EU" dréit, säin Numm net verdéngt, seet d'Tilly Metz.

"Datt elo ausgerechent an den zukunftsorientéierte Beräicher gekierzt gouf, ass net richtege Message."

Gréisste Kritikpunkt: Rechtsstaat-Mechanismus

Wien de Prinzip vun der Rechtsstaatlechkeet net respektéiert, soll keng Sue méi vu Bréissel kréien, respektiv bestrooft ginn, sou eng zentral Fuerderung vum Europaparlament.

Grad op deem Punkt ass den Text, deen d'Europäesch Kommissioun proposéiert hat, elo e awer puer Mol am Laf vun de Verhandlunge geännert ginn. Net zum positiven, wéi vill Europadeputéiert soen.

Uganks war vun engem System vu Konditioune Rieds, déi mussen erfëllt ginn, fir iwwerhaapt Suen ze kréien. Wien déi net erfëllt, gëtt vun der Kommissioun sanktionéiert, sou de Plang. A just wann d'Memberlänner sech ongerecht behandelt fillen, da géif driwwer ofgestëmmt ginn, ob déi Sanktiounen a Kraaft bleiwen oder net.

Elo steet just am Text, datt d'Kommissioun esou ee Regime ausschaffen a Mesurë proposéiere soll. Mesuren, déi da vun de Länner musse majoritär ugeholl ginn.

Dem Premier Xavier Bettel seng Liesaart vun där Ännerung war kuerz nom Sommet positiv. Endlech géif de Lien mat den europäesche Wäerter gemaach ginn.

"Dat ass eng nei Etapp. Europa ass net nëmmen d'Distributioun vun deene Fongen, mee et ass och de Respekt vun deene Wäerter."

"Kommissioun muss Garantie liwweren"

Fir de Marc Angel awer ass dee neien Text awer däitlech méi schwaach. Ursprénglech wier d'Suspensioun vun de Sue virgesi gewiescht, am Fall, wou ee sech net un d'Wäerter hält. "Elo wësse mer net genee wat d'Kommissioun an esou engem Fall proposéiert."

Do gouf d'Chance verpasst, Neel mat Käpp ze maachen, fënnt d'Tilly Metz. "Et gëtt keng kloer Konditionalitéit festgehalen", sou déi gréng Europadeputéiert.

De Charel Goerens vun der DP hätt do gäre kloer Aussoen, kloer Engagementer vun der Kommissioun, wéi dat Instrument konkret soll ausgesinn.

"Ech hu ganz konkret Erwaardungen un d'Europäesche Kommissioun. Well si ass déi, déi dem Parlament kann déi néideg Assurance ginn."

Och fir de Christophe Hansen, Europadeputéierte vun der CSV, feelt et do u Prezisiounen.

"Mir brauchen ee ganz geneeën Zäitplang doriwwer, wéi dee Rechtstaats-Mechanismus soll ëmgesat ginn."

Esou Garantië kéint d'Kommissioun allerdéngs à ce stade just mëndlech en Donneschdeg am Debat an der Plenière vum Parlament liwweren. Well um Text kann d'Parlament näischt änneren, dat gëtt de Christophe Hansen zou.

"Amendementer sinn net méiglech. Mee d'Parlament kann Nee soen, an esou wéi den Accord elo ass, hunn ech vu vill Leit bei eis an der Fraktioun héieren, datt si esou mam Pak net liewe kënnen."

Parlament prett, "konstruktiv ze verhandelen"

An deene Fraktioune gëtt elo hefteg diskutéiert. Den Drock op d'Parlament ass grouss. Well elo deen Accord, deen no zéien deeglaange Verhandlungen zustane koum, net unzehuelen, kéint heeschen, datt d'Ausbezuele vun de Sue retardéiert gëtt.

An der Resolutioun, iwwer déi en Donneschdeg ofgestëmmt gëtt, steet och, datt d'Parlament prett ass, "direkt konstruktiv Verhandlunge mat de Memberlänner opzehuelen, fir d'Propose ze verbesseren".


An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.

An der Mediathéik:

Europa Aktuell / / Danièle Weber
Lauschteren

Méi zum Thema

Ursula von der Leyen, Xavier Bettel
EU-Sommet

D'EU gëtt sech eens iwwer e Finanzpak vun 1,8 Billiounen Euro, dorënner ee Fonds de Relance vu 750 Milliarden Euro. De roude Bic gouf a Beräicher ugesat, fir déi sech Lëtzebuerg staark gemaach hat.

Danièle Weber virum Kommissiounsgebei zu Bréissel Analys
EU-Sommet

Den EU-Sommet geet an de véierten Dag. Zanter e Freideg de Moie verhandelen d'Staats- a Regierungscheffen iwwer ee Finanzpak vun 1,8 Billiounen Euro. Wisou ginn déi 27 sech net eens, a wéi geet et weider?

Programm

Net verpassen

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen