Nordstadgemeng "Et muss ee mat Häerzblutt derbäi sinn"

No zéng Joer huet den Abbes Jacoby sech gëschter aus dem Ettelbrécker Gemengerot zeréckgezunn fir enger jonker grénger Conseillère Plaz ze maachen.

Et wier him wichteg, datt grad déi Jonk d'Chance kréien sech aktiv um Fusiounsprozess ze bedeelegen, sou begrënnt den Abbes Jacoby säi Schrëtt. Hie geet och dovunner aus, datt déi jonk "nach méi" hanner dem Fusiounsprozess stinn.

"Ech mengen, déi jonk Generatioun - an et ass dat eppes wat d'Politik verkennt - déi si schonn e Schrëtt viraus, wéi se liewen, wéi se dat verstinn a wéi dat besonnesch op kommunalem Niveau funktionéiert. Bei där eelerer Generatioun ass ëmmer nach e bëssen déi "Hunn-um-Mëschtekoup-Mentalitéit". Déi Jonk, déi gesinn dat ganz anescht, déi gesinn dat vill méi oppen. Et trëfft ee kaum ee Jonken zu Ettelbréck, dee seet "Ech si virun allem en Ettelbrécker"."

Den Abbes Jacoby kéint net wierklech novollzéie, firwat déi Responsabel aus de fënnef Nordstad-Gemenge 5.000 Euro pro Awunner vun der Regierung froen, fir mateneen ze fusionéieren. 5.000 Euro pro Awunner wier duebel esou vill wéi de Subsid, dee gewéinlech bei Gemengefusioune vum Staat bezuelt gëtt. D'Lëscht vu Projeten, mat deenen dee Montant begrënnt gëtt, wier awer zimmlech "farfelu".

Den Abbes Jacoby huet vun 1988 bis 2015 fir déi gréng geschafft, fir d'éischt als parlamentaresche Mataarbechter, duerno als Fraktiounssekretär. Hien huet also de Wee vun der Protest- iwwer d'Oppositiouns- bis bei d'Regierungspartei materlieft, wann och net an der éischter Rei, mee méi am Hannergrond.