D'Outile kréich een net méi gebremst. Et misst een domat liewen a se richteg benotzen, mengt de Patrick Remakel vum SNE. Fir d'Enseignanten am Fondamental wier ChatGPT awer e bësse manner problematesch, well do éischter méi zouen Exercicë gemaach géifen.
"An ech mengen eise Rôle ass eben - sou wéi mer dat och musse maachen - net nëmmen an der Schoul Fächer enseignéieren, ma och de Gebrauch mat de Medien thematiséieren."
Wat déi Jugendlech awer méi al géife ginn, wat den Outil och méi geféierlech kéint ginn, gëtt den SNE-President ze bedenken.
Educatiounsministère wëllt Enseignantë per Newsletter informéieren
Well ChatGPT nach zimmlech nei wier, hätt ee sech bei der Enseignantsgewerkschaft nach keng Gedanke kënnen doriwwer maachen, wéi eng Konsequenzen den Outil fir d'Enseignantë wäert hunn. Dem Patrick Remakel no misst een an der ganzer Educatiounspolitik zesumme kucken, wéi een domat ëmgeet.
Wéi et aus dem Educatiounsministère heescht, soll dëse Mount nach eng Newsletter un d'Léierpersonal erausgoen, déi iwwer den Ëmgang mat ChatGPT soll informéieren.
