Reorganisatioun vum RGTR-Bus Reseau Eng nei App, e Ruffbus a méi Busspuren

De Bus-Reseau RGTR gëtt komplett reorganiséiert. Deen neie Reseau gesäit néng grouss Achse vir, déi déi grouss a regional Pôles d'échangë verbannen. Op deenen néng Achse sinn Expresslinne virgesinn, déi op Busspure solle fueren, sou de Mobilitéitsminister François Bausch.

Carole Schimmer / cz

Bus
Foto: Taina Sohlman

Wéi den Numm et géif soen, géifen dës Busse séier fueren an ënnerwee net dacks stoe bleiwen, fir d'Leit vun de Pôles d'échangë mat hirer Destinatioun ze verbannen. Déi Pôle d'échangë géifen iwwer Zoubréngerlinnen alimentéiert ginn.

Dobäi kommen transversal Strecke fir den ëffentleche Bus-Transport. Regional a lokal Buslinne verbannen de ländleche Raum mat deene Pôles d'échangen. Zesumme mat Ponts et chaussées gëtt och un engem Luuchteschaltsystem geschafft. D'Busse wiere mëttlerweil geolokaliséiert, wat et géif erlaben, méi laang am Viraus d'Luuchten ëmzeschalten.

Ruffbus an nei App

Nei an där Strategie fir den ëffentlechen Transport ass d'Aféiere vun engem Ruffbus, deen ee kann op een Arrêt bestellen, seet de François Bausch. Ausserhalb vun de Spëtzestonne géifen et am ländleche Raum ganz aner Besoine ginn, sou de Minister, dofir hätt ee sech entscheet fir esou e Service anzeféieren. Dee Service vernetzt d'Arrête vun der Regioun ënnertenee a verbënnt se och mat de wichtege Pôle d'échangen.

Fir d'Visibilitéit vum Reseau ze verbesseren, gëtt eng nei App ausgeschafft, déi Mobilitéit.lu-App ersetze soll. Dës App géif déi nächst Woch presentéiert ginn.

"Wat ee System wäert opbaue komplett an d'Echtzäit. Dat heescht, et limitéiert sech net op d'Fro vu rengen Horairen. Dee System wäert ganz genee soen, wéi de Reseau grad ass. Dat heescht Alles wat ee proposéiert kritt, wann ee vun A op B wëllt fueren ass an Echtzäit, inklusiv esouguer de Stroossentraffic."

Schwéier fir genuch Buschaufferen ze fannen

All Joer kéime 50 Busse bäi. Eng vun den Erausfuerderunge wier iwwerdeems, an Zukunft genuch Buschaufferen ze fannen, seet den Alex Kies vum Mobilitéitsministère.

"Och hei am Land gëtt et ëmmer méi schwéier, Buschaufferen ze fannen. Wat natierlech dozou féiert, Leit ze rekrutéieren, datt d'Betriber dacks déi Leit huelen, déi se kënnen astellen, an et gëtt eng héich Fluktuatioun. Dat hat ee viru Joren nach net. Et ass eben och deem geschold, datt een an de Spëtzestonnen ëmmer méi Gefierer brauch an och ëmmer méi Leit."

Dee Manktem u Buschauffere confirméiert den OGBL-ACAL, net de Loun wier determinant, mee d'Aarbechtskonditiounen, sou den Zentralsekretär Sveinn Graas. Dat géif an den Ae vun der Gewerkschaft awer och doru leien, datt d'Aarbechtsbedéngunge fir e Buschauffer relativ schwiereg wieren, "well si 12, 13, 14 an heiansdo 15 Stonne mussen ënnerwee sinn".

Luef vun der Gewerkschaft fir Busspuren

D'Aféiere vu méi Busspure wier awer positiv, esou de Sveinn Graas, well sech d'Aarbechtsbedéngunge fir d'Buschaufferen doduerch potentiell géife verbesseren.

Deen neie Bus-Reseau soll vu Mee d'nächst Joer un a Phasen ëmgesat ginn. Elo kréien d'Gemengen dee Plang presentéiert, déi hunn da sechs Wochen Zäit fir hiren Avis ofzeginn.

An der Mediathéik:

Aktuelles / / Carole Schimmer
Lauschteren

Méi zum Thema

Geoffrey Caruso
Ëffentlechen Transport

De gratis ëffentlechen Transport wäert net dozou féieren, datt vill méi Leit op Bus, Zuch an Tram wäerten ëmklammen, seet de Geoffrey Caruso. Et géif éischter op d'Qualitéit vum Service ukommen.

2018-11-23-Koalitiounsgespréicher
Koalitiounsverhandlungen

DP, LSAP an déi gréng hunn e virleefege Kompromëss fonnt fir den ëffentlechen Transport gratis ze maachen. Als Géigepartie soll déi steierlech Kilometerpauschal reduzéiert ginn. D'Zuele sollen awer nach emol duerchrechent ginn.

80 Stonnekilometer
Tempolimitt op de Landstroossen

Dat fuerdert d'Sécurité Routière op zweespurege Landstroossen. Lëtzebuerg hätt kee gudde Bilan, wat d'Verkéierssécherheet ugeet. Dës Vitesslimitatioun kéint hëllefen dat z'änneren, seet de Paul Hammelmann.

Traffic Jam
Verkéier

Mam ville Stau op de Stroossen hunn och Schüler all Dag ze kämpfen. Si brauche mam ëffentlechen Transport ëmmer méi laang bis an d'Schoul. Eng Iddi ass et, d'Schoul um néng Auer unzefänken.

Programm

Net verpassen

  • Nei Museksemissiounen

    Bigstock / real_content

    Al Schanken: Freides, 21:00

    Mat Groove a Séil: Samschdes, 19:00

    Palatino FM: Samschdes, 21:00

Dossieren

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen