Russland-Konflikt Energiepräisser: Regierung annoncéiert Mesurë fir Privatstéit
Wéinst dem Russland-Konflikt huet d'Lëtzebuerger Regierung de Mëtteg Mesure fir d'Privatstéit fir e staatleche Käschtepunkt vu 75 Milliounen Euro annoncéiert. Wéinst dem russesche Krich an der Ukrain sinn d'Energiepräisser scho staark geklommen a maachen dat den Erwaardungen no och weider. Déi verschidde Mesurë goufen haut am Regierungsrot decidéiert.
Éischt Mesure: D'Energiebedreiwer sollen de Cliente keng Reseauskäschte méi facturéieren, a kréichen déi vum Staat kompenséiert. Dat kéint fir e Stot eng Erspuernis vu bis zu 500 Euro d'Joer ausmaachen, esou den Energieminister Claude Turmes op der Pressekonferenz nom Regierungsrot.
Zweetens wier et d'Zil fir d'Stroumpräisser dëst an d'nächst Joer ze stabiliséieren. Drëttens gëtt fir Leit mat méi nidderegem Revenu eng Energieprimm vun 200 bis 400 Euro d'Joer agefouert - zousätzlech zur Hausse vun der Allocation de vie chère, déi d'Regierung schonn de leschten Hierscht decidéiert hat, esou d'Familljeministesch Corinne Cahen. "Mir wäerten all riskéieren d'Konsequenzen ze spieren", esou de Message vum Premier Xavier Bettel.
Fir d'Betriber gëtt nach un engem spezifesche Mesurëpak geschafft, sot de Wirtschaftsminister Franz Fayot, do géifen et verschidde Piste ginn, zum Beispill de Chômage partiel. De Mesurëpak fir d'Betriber soll zu engem spéideren Zäitpunkt annoncéiert ginn.
Méi zum Thema
Enovos-Generaldirekter geet vun engem stabillen héijen Niveau aus
Den Erik von Scholz mengt net, datt de Konflikt tëschent Russland an Ukrain zu Enkpäss bei der Gas-Versuergung féiert. De Marché géif sech duerch déi aktuell Kris méi staark globaliséieren.
EU schafft u "Gas fir de Wanter-Plang"
Déi nächst Woch wëll d'EU-Kommissioun ee Plang presentéieren, doriwwer, wéi sech d'EU besser op esou eng Kris preparéieren kann. Dozou gehéiert et och, d'Länner ze verflichten, d'Gas-Späichere mat Zäiten opzefëllen.
Konsumenteschutz: "D'Energiepräisser musse gedeckelt ginn"
Duerch déi aktuell Hausse vun Energiepräisser stéing d'Existenz vu verschidde Leit um Spill, seet den Nico Hoffmann. De Konsumenteschutz fuerdert, datt d'Präisser um aktuellen Niveau agefruer ginn.
Héich Energiepräisser: Eng exzeptionell Hëllef fir Betriber
Entreprisen, déi besonnesch ënner héijen Energiepräisser leiden, solle vun EU-Memberstaate gehollef kréien. Dat fuerderen d'Ministere Claude Turmes a Franz Fayot an engem Bréif un d'EU-Kommissioun, deen eis virläit.
