Nom Kären-Deal Éischt Schëff aus der Ukrain um Wee fir an de Libanon

Dat éischt Fracht-Schëff mat 26.000 Tonne Mais aus der Ukrain ass ënnerwee an de Libanon. Zur gläicher Zäit dreet Russland op en Neits domat, sech net un den Accord iwwer Käre-Liwwerungen aus der Ukrain ze halen. Moskau behaapt, de russeschen Export vu Kären, Liewensmëttel an Dünger wier duerch westlech Sanktioune massiv behënnert.

Danièle Weber / sam

D'Schëff Razoni um Mier
D'Schëff Razoni. Foto: Yulii Zozulia / Avalon

Lauschteren


Vun europäescher Säit war den Depart vum Schëff mam Numm Razoni e Méindeg vum ukraineschen Hafen Odessa ausdrécklech begréisst ginn.

"E gudden éischte Schratt"

Den Depart war annerhallef Woch nodeem Moskau säi Blockage opginn huet, an een Export-Accord fir ee sécheren Transport vun ukrainesche Kären an aneren Agrarproduiten aus der Ukrain eraus fonnt gouf.

De Peter Stano, Spriecher vun der Europäescher Kommissioun, begréisst dës Entwécklung och:

"Dat ass e gudden éischte Schratt - fir déi global Liewensmëttel-Kris ofzeschwächen, déi vun der russescher illegaler Aggressioun ausgeléist gouf, nodeem Russland Häfe blockéiert an en plus Felder oder Siloen an der Ukrain zerstéiert huet."

Elo géif een drop waarden, datt dee ganzen Accord kann ëmgesat ginn, an aner Transporter mat ukrainesche Kären an d'ganz Welt kënnen organiséiert ginn, esou de Peter Stano.

Libanon als Destinatioun fir Kären-Export

Libanon gouf als Zil gewielt, well et eent vun deene Länner ass, dat largement vun Importer aus der Ukrain ofhänkt an den Ament an enger déiwer Kris stécht, déi duerch de Krich an der Ukrain verschäerft gouf.

D'Land hätt d'lescht Woch eng Liwwerung mat Käre refuséiert, déi an der Ukrain geklaut gi waren a mat der Hëllef vu Russland per Schëff an de Libanon transportéiert goufen, erkläert de Spriecher vun der Europäescher Kommissioun. Deemno wier et gutt, datt Libanon elo d'Destinatioun fir ee korrekten Export aus der Ukrain wier.

D'Schëff soll en Dënschdeg spéit zu Istanbul vu Vertrieder vun der Ukrain, Russland, der Tierkei an de Vereenten Natiounen inspizéiert ginn an da viru fueren.

Zukunft vum Kären-Transport nach ongewëss

Et ass net gewosst, wéini déi nächst Liwwerungen op de Wee bruecht ginn.

Onkloer ass och nach, ob sech Moskau un den Accord hale wäert a prett ass, déi Sécherheets-Couloiren effektiv ze respektéieren.

Well dat wackeleg ass gëtt et Stëmmen, notamment vum däitsche Landwirtschaftsminister Cem Özdemir, déi opruffe fir aner Weeër ze sichen, fir déi Millioune Kären, déi nach an der Ukrain lageren, aus dem Land ze kréien.

Méi zum Thema

Schëff Hafen Kären Odessa
No Verhandlungserfolleg

Déi éischte Kéier zënter dem Ufank vum russesche Krich an der Ukrain huet de Méindeg de Moien ee Schëff mat Kären den Hafe vun Odessa verlooss. Dem tierkesche Verteidegungsministère no wier d'Schëff a Richtung Libanon ënnerwee.

Weess Kären
Honger an der Welt

Et misst alles dofir gemaach ginn, fir datt d'Ukrain sou séier wéi méiglech nees Weess a Käre kann exportéieren. Dat war de Message deen d'Staats- a Regierungscheffen haut um EU-Sommet zu Bréissel ginn hunn.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen