Wéi et am Solidaritéitspak virgesinn ass, muss elo eng Tripartite aberuff ginn. De Premier Xavier Bettel géif bannent den nächste Wochen den Tripartite-Koordinatiounscomité zesummeruffen, heescht et am Communiqué.
Dëst wier deemno déi zweet regulär Indextranche dëst Joer. Am ganze ginn et der awer dräi: Eng éischt Indextranche war jo op den 1. Februar erfall. Am Abrëll kënnt eng weider Indextranche, déi vu leschtem Juni reportéiert gi war. Wann déi drëtt Tranche kënnt, dann am véierte Semester. Wéini genee se wäert declenchéiert ginn, ass nach net gewosst.
Statec rechent fir 2024 mat Inflatiouns-Schock
De Statec rechent och fir Ufanks 2024 mat engem Inflatiouns-Schock, wann d'Mesuren, déi d'lescht Joer am Tripartite-Accord festgehale gi waren, Enn Dezember auslafen.
De Premier Xavier Bettel huet an engem Tweet geschriwwen, dass eng nei Tripartite fir zousätzlech Sécherheet fir d'Leit a Betriber bedeit: d'Mesure vun der Regierung géif wierken, Lëtzebuerg hätt déi niddregst Inflatioun an der Eurozon. An d'Regierung géif d'Kafkraaft an d'Aarbechtsplazen och iwwert d'Enn vum Joer eraus, ofsécheren.
