Firwat d'Reform nach ëmmer schleeft? Well wéinst der Verfassungsreform Zäit gefeelt huet, ass d'Äntwert, déi ee vum President vun der Chamber-Institutiounekommissioun kritt. De Mars Di Bartolomeo betount awer och, datt net näischt geschitt ass.
"Fir d'éischt muss ee jo Mol soen, datt den Ombudsman seng Entrée an d'Verfassung fonnt huet."
Amplaz den Ombudsman ze reforméieren huet d'Chamber eng aner Initiativ geholl. Mam Zil fir Synergien tëscht dem Ombudsman, dem Centre pour l'égalité de traitement, an dem Ombudsman fir d'Rechter vu Kanner a Jugendlecher ze erméiglechen. Also dräi Strukturen, déi un d'Chamber rattachéiert sinn, an déi ee gemeinsame legale Kader solle kréien.
"Dat soll finaliséiert gi bis den Hierscht. Enn Summer, Ufank Hierscht. An da muss eng nei Institutiounekommissioun hir politesch Responsabilitéit iwwerhuelen."
D'Kompetenze vum Ombudsman sollen erweidert ginn
No de Wale muss also tranchéiert ginn: Wéi wäit soll d'Zesummenaarbecht goen? Soll ee sech administratiivt Personal deelen, oder vläicht souguer fusionéieren? De Mars Di Bartolomeo leet sech hei nach net fest a seet just: eng méi enk Zesummenaarbecht géif Sënn maachen.
D'Kompetenze vum Ombudsman sollen awer egal wéi erweidert ginn. Notamment fir datt Bierger och géint privat Acteure kéinte reklaméieren, déi am Optrag vum Staat ëffentlech Déngschtleeschtungen assuréieren, also zum Beispill Alters- a Fleegeheemer, awer och Crèchen oder Foyeren.
"Fir mech ass et ganz kloer, datt den Ombudsman d'Kompetenz an deenen Etablissementer, déi Dir genannt hutt, soll kréien."
Bleift ofzewaarden, ob eng nächst Regierung dat an hire Koalitiounsaccord schreift - an et déi Kéier dann och ëmsetzt.
