Chamberwahlen 2018 "Douzièmes provisoires" fir de Budget 2019

Wéinst de Chamberwahlen am Oktober wier et net ubruecht, datt déi aktuell Regierung e komplette Budget fir 2019 opstellt, seet den DP-Fraktiounschef Eugène Berger. Den CSV-Spëtzekandidat Claude Wiseler fënnt et "sënnvoll a logesch", keng politesch Akzenter méi ze setzen.

Serge Kesseler / cbi

Budget 2019
Foto: Bigstock / snowing.

Datt wéinst de Wahlen kee komplette Budget fir 2019 opgestallt gëtt, wier net nëmmen eng Saach vu Fairplay, mee och vu politeschem Anstand, esou den DP-Fraktiounschef.

"Douzièmes provisoires"

Dowéinst wäert et fir déi éischt Méint 2019 een administrative Budget mat sougenannten "Douzièmes provisoires" ginn, kënnegt de President vun der Chamber Finanz- a Budgetskommissioun un. Dat hätt een 2013 och scho gehat, wou een an der selwechter Situatioun gewiescht wier. "Douzièmes provisoires" géing heeschen, datt e Budget bis Abrëll dat Joer duerno festgeluecht géing ginn, an et géingen déi eenzel Budgetsposte vun 2018 geholl ginn, an dann "et rechent een deen dann nach eng Kéier op véier Méint héich", erkläert den Eugène Berger.

Bis de September oder Oktober dëst Joer soll dësen technesche Budget fir déi véier éischt Méint 2019 fäerdeg sinn, esou den DP-Fraktiounschef. Eréischt déi nei Chamber soll dëse Projet da stëmmen. Et misst een den éischte Januar kënnen e Budget hunn. Déi "Douzièmes provisoires" géingen dann an der leschter Woch vum Dezember gestëmmt ginn. Domat soll garantéiert sinn, datt de Staat vu Januar bis Abrëll 2019 finanziell ka funktionéieren.

Budget: Aufgab vun der neier Majoritéit

Et wier dann un enger neier Majoritéit, egal wéi déi dann nom 14. Oktober géing ausgesinn, fir datt déi dann hire Budget fir 2019 opstellt. Dës nei Majoritéit hätt dann och eng Chance, fir hir eegen Akzenter ze setzen. Virun Enn Abrëll 2019 soll deen neie Staatsbudget an der Chamber gestëmmt ginn. Den Eugène Berger geet dann dovunner aus, datt den nächste Finanzminister, egal wien et da wier, dat esou séier wéi méiglech géing an Ugrëff huelen an dann Enn Februar oder Ufank Mäerz en normale Budget kéint presentéieren.

Fir de Staatsbudget fir déi éischt Méint vum Joer 2019 keng politesch Akzenter méi ze setzen, dat wier "sënnvoll a logesch", esou den CSV-Spëtzekandidat Claude Wiseler an enger éischter Reaktioun. "Wat dann duerno d'Realitéit gëtt, dat gesi mir", seet den CSV-Fraktiounschef. Den Zäitpunkt vun de Wahlen am Oktober wier e schwieregen Exercice fir déi al Regierung, well se am Fong keng finanziell Engagementer kéint maachen, ebe well se net wéisst, wéi d'Wahlen ausginn.


De Serge Kesseler am Panorama, den 20. Juni um 12 Auer:

Lauschteren

Méi zum Thema

Budget 2017 Dossier
Ëffentlech Finanzen

Artikele ronderëm de Staatsbudget fir 2017, deen den 12. Oktober deposéiert ginn ass.

Staatsbudget
Budget 2017

Trotz staarkem Wirtschaftswuesstem soll den Defizit vum Zentralstaat 2017 bei bal enger Milliard Euro leien. Staark Investissementer an d'Steiererliichterunge sollen de Budget justifiéieren.

Net verpassen

Programm

Dossieren

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen