De Code du Travail ass kloer: An enger reng privater S.A. vun iwwer 1.000 Salariéë muss d'Personal am Verwaltungsrot vertruede sinn. Bei S.A.e mat iwwer 25 Prozent staatlecher Bedeelegung spillt d'Gréisst keng Roll. Déi Reegele sinn 1974 ageféiert ginn, erkläert de Jurist an Expert am Aarbechtsrecht Jean-Luc Putz.
D'Iddi wier deemools gewiescht, eng Demokratie an der Entreprise ze hunn, fir all Mataarbechter e Matsproocherecht ze ginn. An deene concernéierte Verwaltungsréit sollen d'Personalvertrieder vollwäerteg Membere sinn, e vollt Stëmmrecht hunn a bei all Decisioun dierfe matschwätzen, seet de Jean-Luc Putz.
Wou huet d'Regierung iwwer 25 Prozent Parten?
D'Regierung muss d'Entreprisen, déi d'Critèren erfëllen, an engem groussherzoglechen Arrêté festhalen: Op där Lëscht stinn d'Luxair, Luxairport, d'Cegedel (déi no enger Fusioun 2009 Creos heescht an elo zum Grupp Encevo gehéiert), d'SES an d'CLT (haut: CLT-UFA).
Et feelen: 17 anonym Societéiten, bei deenen de Staat eegenen Angaben no méi wéi ee Véierels vun de Parten huet. Dorënner Luxconnect, LuxGovsat, Luxtrust, Encevo a Luxtram.
"Gesetz ass Gesetz"
D'Regierung hätt eigentlech d'Obligatioun d'Gesetz ze applizéieren. Een Ermoossensspillraum wier net virgesinn, seet de Jean-Luc Putz.
"D'Gesetz ass nun emol d'Gesetz. An et gëtt ee Prinzip, datt ee Gesetz net 'désuet' ass, also mat der Zäit awer gëllt, och wann et haut vläicht net méi adaptéiert ass." Et misst een d'Gesetz éischter änneren, wéi et einfach de facto net unzewenden, mengt de Jurist.
Luxtram: Personalvertriedung net am Verwaltungsrot
Firwat gëtt d'Gesetz net applizéiert? Wéi et schéngt well keen dono freet. Dat weist d'Beispill vu Luxtram, wou den Ament zwar ee Sozialkonflikt herrscht, d'Thema awer trotzdeem net op d'Dagesuerdnung koum. Eréischt no enger Ufro vum radio 100,7 beim Mobilitéitsministère koum d'Äntwert, et wier effektiv vergiess sinn, sech hei "en confirmité" setzen. Dat géif elo nogeholl ginn.
De Luxtram-Generaldirekter André Von der Marck confirméiert, datt déi entspriechend Prozeduren elo an d'Weeër geleet ginn. Als éischt misst d'Regierung den entspriechenden Arrêté grand-ducal upassen. Wann d'Statute vu Luxtram da geännert goufen, da géif een d'Personalvertriedung mat an de Verwaltungsrot integréieren.
Luxtram wier eng jonk Societéit an hätt eréischt zanter 2016 eng Personaldelegatioun, betount den André Von der Marck: Ob hie sech bewosst war, datt d'S.A. d'Gesetz während véier Joer net applizéiert hätt, wëllt de Generaldirekter net kommentéieren. Hie sträicht ervir, datt dës Ännerung awer extrem positiv wier, an datt d'Gouvernance vu Luxtram doduerch verbessert géif ginn.
Net all Match gëtt am Verwaltungsrot gemaach
Et wier duerchaus wichteg fir d'Gewerkschaften, fir a Verwaltungsréit vertrueden ze sinn an do fréizäiteg iwwer Decisiounen informéiert ze ginn, seet de Christian Sikorski vum OGBL. Mee d'Gewerkschaften hätten am Fall Luxtram bis elo net gefuerdert, datt d'Gesetz agehale gëtt. De Verwaltungsrot wier zwar eng wichteg Plaz, "mee de Match gëtt net am Verwaltungsrot gemaach". D'Loun- an Aarbechtskonditiounen tëschent de Sozialpartner géifen um Niveau vun de Verhandlunge vum Kollektivvertrag decidéiert ginn, esou de Christian Skiorski. "Et ass do, wou de Match gemaach gëtt".
Datt d'Thema grondsätzlech keng Prioritéit méi huet weist och, datt am Kader vun der Reform vun 2015 iwwer de Sozialdialog an de Betriber d'Fro vum Matsproocherecht an de Verwaltungsréit kaum ugeschwat gouf.