Chamberwahlen 2018 "Demokratie": Kandidate vu Police virgelueden
Am Kontext vun de Kandidatelëschte vun der Partei Demokratie ass bis op Weideres net kloer, ob déi Leit, déi eegenen Aussoen no ouni hiren Accord op de Lëschte vertruede sinn, dowéinst och eng Plainte kënne maachen.
Et wiere Persounen um Police Büro vu Bieles virstelleg gewiescht, sot eis op Nofro de Policespriecher. Si hate gemellt, datt si op der Kandidatelëscht vun der Partei Demokratie wieren an dat net wéilten.
D'Police präziséiert, datt déi Persounen net nëmmen d'Deklaratioun fir Kandidat ze ginn ënnerschriwwen hunn, mee och bei der Gemeng ee Certificat ugefrot hunn, dee beleet, datt si op der Wielerlëscht stinn. Wéinst där zousätzlecher Demarche wier et fir d'Police net kloer, op Basis vu wat déi Persounen eng Plainte kéinte maachen, an ob et sech ëm ee penale Fall géif handelen. Elo ginn déi Persounen a weider concernéiert Leit vun der Police virgelueden, fir nach eng Kéier verhéiert ze ginn. Op Grond dovunner géif ee Bericht un de Parquet geschéckt ginn, an net ee Protokoll. Dono ass et um Parquet ze decidéieren, ob et ee penale Volet gëtt oder net.
Méi zum Thema
"Lëschte kënnen net zeréckgezunn an net geännert ginn"
D'Gesetz gesäit keng Méiglechkeet vir, fir eng Kandidatelëscht fir d'Chamberwahlen zeréckzezéien, oder fir e Kandidat vun enger Lëscht ze sträichen. Dat confirméiert d'Presidentin vum Haaptwahlbüro an der Stad.
"Ech hu mech ni fir eng Lëscht interesséiert"
Op der Lëscht vun der Partei Demokratie sinn eng ganz Partie Leit déi soen, si hätten hiren Accord ni ginn, fir Kandidat ze ginn. D'Initiativ kritt Manipulatioun virgeheit. Verschidde Betraffener soen, si hätten eng Plainte gemaach.
Exklusiv
Net déi néideg Ënnerschrëfte vun den Deputéierten?
Dem Uschäin no huet keen Deputéierten d'Kandidatur vun der Biergerinitiativ Demokratie2018 mat senger Ënnerschrëft ënnerstëtzt. De leschte Freideg haten déi Responsabel vun där Biergerinitiativ dat virun der Press behaapt.
