De Gérard Koneczny, ee vun de Membere vum Comité d'initiative, hofft, datt dës Prozedur sech an der Populatioun gutt ronderëm schwätzt an datt d'Leit de Courage fannen, dës Demande op der Gemeng ze ënnerstëtzen.
De Gérard Koneczny hat och déi ëffentlech Petitioun lancéiert, déi e Referendum iwwert déi ganz geplangte Verfassungsreform verlaangt hat. Dës Petitioun war vu knapp 18.650 Leit ënnerschriwwe ginn: dat war een neie Rekord. Dat hätt d'Bevëlkerung waakreg gemaach, mengt de Gérard Koneczny.
D'Chamber hat haut viru véier Wochen - den 20. Oktober - eng éischte Kéier fir d'Justizkapitel vun der Verfassung gestëmmt. Den zweete Vott an der Chamber kann duerch ee Referendum ersat ginn, wann op d'mannst 16 oder méi Deputéiert dat wëllen, oder wann op d'mannst ageschriwwe 25.000 Wieler dës Demande op der Gemeng ënnerschreiwen.
Enn Oktober hat ee Comité d'initiative vun aacht Memberen dem Premierminister Xavier Bettel ee Bréif geschéckt, an deem si esou eng Demande fir e Referendum gefuerdert hunn. Déi aktuell Verfassung gesäit dës Prozedur esou vir.
