"Mir hu keng Alternativ zum Diesel", seet de Ben Frin aus der Direktioun vum Stroossentransporter Arthur Welter. Dofir huet hien d'Erhéijung vun der CO2-Steier schonn ongerecht fonnt.
Datt de Krich de Pëtrolspräis elo nach eemol an d'Luucht dreift, arrangéiert natierlech näischt. All Cent méi um Liter Diesel géif d'Entreprise 120.000 Euro d'Joer kaschten. Den Impakt vun de rezenten Haussen - 35 Cent zanter dem 1. Januar - ass also gewalteg.
Arthur Welter wëllt wa méiglech Tariffer noverhandelen
Arthur Welter wäert kuerzfristeg mat där Augmentatioun kämpfe mussen, seet de Ben Frin. Et kéint een déi Hausse nämlech net un all Client weiderginn: deelweis wieren d'Tariffer fir 2022 nämlech schonn negociéiert.
Dofir wéilt Arthur Welter kucke fir mëttelfristeg d'Tariffer vun 2022 nozeverhandelen. Bei engem Deel vun de Clientë gëtt den Tarif ugepasst, jee no Variatioun vum Dieselspräis, mee och dat geschitt zäitlech decaléiert.
Ëmmerhi wier de Risiko, datt Clienten ofsprangen, geréng. Fir d'Cliente gëtt et nämlech dacks keng Alternativ zum Transport iwwer d'Strooss, seet de Ben Frin.
Hie geet dovunner aus, datt d'Konkurrenz déi nämmlecht Problemer huet an hir Tariffer och missten no uewen upassen, sou datt do Chancëgläichheet garantéiert ass.
Luxair: Indextranchë kéinte problematesch ginn
Der Luxair dinn déi aktuell Präishaussen erstaunlecherweis net wéi, well si de Kerosin fir 2022 schonn an de leschten zwee Joer kaaft huet, wou de Präis méi niddreg war.
De Gilles Feith mécht sech Suergen ëm déi vill Indextranchen a kuerzer Zäit: No der Indextranche am Oktober rechent hien domadder, datt am Abrëll déi nächst kënnt.
"Wann dann nach eng Kéier dëst Joer kënnt, also ech weess net, wéi mer déi Käschtenexplosioun kënne verdauen."
Hie wéilt den Index net a Fro stellen, seet de Gilles Feith. Mee de Cumul vun all deem wat méi deier gëtt, do misste Léisunge fonnt ginn.