USA Déi zwou alternativ Realitéiten an den USA

An den USA gi weider Ugrëff vu Supporter vum President Donald Trump erwaart. Den FBI huet gewarnt, datt et dëse Weekend an um Dag vun der Vereedegung vum Joe Biden zu weidere Versich kéint komme Regierungsgebaier ze stiermen. Déi Leit, déi weider géint dem Trump seng Defaite an de Wale protestéiere wëllen, sinn iwwerzeegt, datt si Recht hunn, och wann alles op enger Lige baséiert.

Philip Crowther (Washington) / cz

Kommentar Philip Crowther
Foto: Archiv

D'Ligen, op där alles baséiert ass déi, datt et fir den Donald Trump onméiglech wier d'Presidentschaftswalen am November ze verléieren. Eng Ligen, déi vum President selwer verbreet gouf, scho virun de Walen, an dunn ëmmer méi a mat ëmmer méi aggressivem Toun wärenddeem d'Stëmmziedelen ausgezielt goufen.

Den Donald Trump ass Schold, datt Honnerte vu senge Supporter de Kapitol erstiermt hunn. Hien ass Schold drun, datt net Dausenden, nee, Milliounen Amerikaner der Wourecht net méi gleewen, den Noriichten net méi gleewen, an an hirer eegener alternativer Realitéit liewen. Hien huet hinne vum héchsten Niveau aus d'Erlabnes gi fir un déi gréisst Verschwörungstheorien ze gleewen, déi wou alles gemaach gëtt fir de President Trump aus dem Wäissen Haus ze geheien.

Annoncéiert Presenz mat Waffen

Elo hu mir Angscht an Amerika, well vill vun deene Leit net nëmmen dodru gleewen. Déi, déi de Wee an déi donkelst Ecke vum Internet fonnt hunn a sech do treffe sinn der Meenung, datt et un der Zäit ass géint d'Leit un der Muecht ze rebelléieren. Virun nach enger Woch wier dat nach witzeg gewiescht, mee e Mëttwoch, 6. Januar, sinn déi Leit, déi et virdru just um Internet oder vereenzelt op Trump-Evenementer am déifsten Amerika gouf, zu enger geféierlecher bewaffneter a ganz reeller Personifikatioun vun de schlëmmste Verschwörungstheorien an dem President senge Lige ginn.

Eppes huet deen Dag gefeelt, an dowéinst hu mir Angscht an Amerika. Et muss ee sech virstellen, dat vill vun dëse rosene wäisse Männer hir Pistoulen a Gewierer doheem oder am Auto gelooss haten. Well Washington déi Waffe verbitt, fille mir eis hei nach e bësse méi sécher. Mee an Amerika steet net nëmmen ee Kapitol. Et gëtt der 50, ee pro Staat, an do an zu Washington wëllen dës Gruppe sech dëse Sonndeg nees weisen, dës Kéier mat Waffen.

En donkelt neit Kapitel an der Geschicht vun den USA

Et mécht schonn esou genuch Angscht. Mee de Fait, datt dës Leit an hirer alternativer Welt liewen, wou den Donald Trump näischt falsch maache kann, wou him d'Presidence geklaut gouf, a wou mir Journalisten hirer Meenung no Lige verbreeden, dat heescht, datt mol net mat hinnen diskutéiert ka ginn.

Elo sinn hei zu Washington Dausenden Zaldote stationéiert fir eis virun de Leit, déi dem President seng Lige gleewen, ze beschützen. En donkelt neit Kapitel an der Geschicht vun den USA schéngt unzefänken, dat ass keng Iwwerdreiwung.

An der Mediathéik:

Chronik / / Philip Crowther
Lauschteren

Méi zum Thema

De Mike Pence an d'Nancy Pelosi
US-President

Den Donald Trump ass nach néng Deeg un der Muecht an den USA. Seng lescht Woch gëtt eng brenzeleg, och fir hien, well en zweeten Impeachment am amerikanesche Kongress schéngt elo warscheinlech.

Programm

Net verpassen

  • Nei Serie: poesik

    jr-korpa-GQeSfSWmXvI-unsplash.jpg

    Dem Jean Portante seng nei Serie stellt Kompositiounen a Lidder vir, Wierder a Kläng, déi der Weltpoesie eng nei Dimensioun ginn a se dem Publikum méi no bruecht hunn.

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen