Déi héich Inflatioun, den Zënstaux an déi schwaach Ekonomie hunn en ganz negatiivt Ëmfeld fir Investisseure geschaf, sou de Fonds de compensation. Dobäi kënnt, datt déi amerikanesch Zentralbank am zweete Semester 2022 Zënsschrëtt nogeholl huet wat de weltwäite Wuesstem weider agebremst huet. Et koum dunn zu schwéiere Perten am Marché vun den Titren a vum Kredit.
Ma och bei den Aktië gouf et 2022 zolitt Perten, sämtlech wichteg Aktienindexen hunn am zweestellege Beräich noginn.
Defizit bei de Sicaven
De Fonds de compensation huet an dem schwieregen Ëmfeld 52 Milliounen Euro u Recettë generéiert bei Fonctionnementskäschte vun 23 Milliounen. Déi schwéier Laascht kënnt awer aus dem Beräich vun de Sicaven, also den Investissementsgesellschafte mat variabelem Kapital, hei bleift um Enn en Defizit vun 3,15 Milliarden Euro. De Rendement vum exzellente Joer 2021 gouf domadder komplett neutraliséiert.
Op den 31. Dezember 2022 beleeft sech d'Gesamtreserv vum Pensiounsfong op 24,54 Milliarden Euro, dat ass 4,29 mol d'Zomm vun dem wat an engem Joer u Prestatiounen ausbezuelt gëtt.
Zwee Prozent an erneierbar Energies
Nieft de Sanktioune géint Russland war 2022 awer och vun engem Strategiechangement markéiert. Et géif een d'Gelder aus der Pensiounsfong méi nohalteg investéieren an d'Prinzippie vun de Vereenten Natiounen an den Engagement vun den Entreprisë vis-à-vis vun den CO2-Emissiounen als Krittären huelen. Dofir gouf och en zweeten Investment-Kompartiment geschaf. Domat ginn zwee Prozent vum Gesamtfong an d'Infrastruktur fir erneierbar Energien investéiert.
